Í vetur eru skipulagðar fjórar ljósmyndasýningar á Vopnafirði sem fram fara í Kaupvangi á föstudagskvöldum í febrúar og mars. Það kostar ekkert að koma, skoða og hlusta og vitanlega eru allir velkomnir. Á sýningunum sýna Vopnfirðingar myndir frá ferðalögum og segja frá ævintýrum sínum.  

Vopnafjörður er langt frá höfuðborg landsins og almennt frekar einangraður. Þrátt fyrir það eða e.t.v. vegna þess eru Vopnfirðingar duglegir að ferðast og margir hafa valið að ferðast til útlanda. Sumir fara beint til Kanaríeyjanna til að njóta sólarinnar, slappa af og gleðjast. Aðrir velja fremur annars konar ferðalög s.s. menningartengd, gönguferðir, borgarferðir svo eitthvað sé nefnt. En flestir taka flottar myndir í ferðalaginu og sumir hafa gaman af að sýna myndirnar sínar og segja frá þegar heim er komið.

Í vetur eru skipulagðar fjórar ljósmyndasýningar sem fram fara í Kaupvangi á föstudagskvöldum í febrúar og mars. Það kostar ekkert að koma, skoða og hlusta og vitanlega eru allir velkomnir. Fyrsta sýningin var 17. febrúar en þá sýndu Björn Halldórsson og Else Möller myndir frá ferðalagi til Falklandseyja undir titlinum „Hvað eiga Falklandseyjarnar og Ísland sameiginlegt?“ Um 25 manns mættu og mikið var spjallað og spurt um samfélagið hinu megin á hnettinum sem að mörgu leiti er líkt Íslandi þótt þar búi aðeins um 4000 manns.

Næstur á dagskrá (3. mars) verður Ólafur Áki Ragnarson en hann ætlar að segja frá ferðum sínum upp á ýmsa fjallatinda. Síðan ætlar Björg Einarsdóttir að sýna myndir frá gönguferð til Perú. Á síðustu sýningunni verða sýndar myndir frá Kambódíu og Víetnam sem Sigríður Bragadóttir og Halldór Georgsson eru nýbúin að heimsækja.

Sjá dagskrá.