Carlo Petrini stofnandi Slow Food og formaður samtakanna frá upphafi, heimsækir Austurland miðvikudaginn 24. maí.  Austfirskar krásir, í samstarfi við Austurbrú, boða til hádegisfundar á Karlsstöðum í Berufirði (Havarí) frá kl 12-14. 

Slow Food samtökin eru grasrótarsamtök sem stofnuð voru á Ítalíu á níunda áratugnum í þeirri viðleitni að snúa við þeirri óheillaþróun sem þá hafði hafist í landbúnaði og matvælaframleiðslu þar sem hraðvirkar aðferðir ógnuðu matarhefðum og gæðum matvæla um allan vestrænan heim.  Samtökin, undir forystu Carlo Petrini, hafa náð eyrum almennings og ráðamanna víða með verkefnum sínum og málflutningi sem hafa vakið athygli á mikilvægi staðbundinnar matvælaframleiðslu fyrir umhverfi og samfélag. Ýmsir háskólar hafa hampað mikilvægi þeirra skilaboða sem Slow Food samtökin flytja um heim allan, meðal annars á Íslandi. Þessi skilaboð eru að maturinn okkar á að vera góður á bragðið, ómengaður og sanngjarn fyrir framleiðandann og neytandann – og það eru mannréttindi en ekki forréttindi að borða góðan mat.

Framúrskarandi framlag

Carlo Petrini er án efa ein áhrifamesta persóna á sviði matvælaframleiðslu á heimsvísu. Hann hefur verið valinn einn af 100 mikilvægustu einstaklingum heims, fékk nafnbótina „European Hero“ hjá Time Magazine árið 2004 og The Guardian útnefndi hann árið 2008 meðal 50 einstaklinga sem gætu bjargað heiminum.

Hann hefur verið þátttakandi í umræðum um sjálfbærni matar og landbúnaðar hjá stofnunum Evrópusambandsins og hjá Matvæla- og landbúnaðarstofnun Sameinuðu þjóðanna (FAO). Árið 2016 var Petrini útnefndur sérstakur sendiherra FAO fyrir Evrópu í tengslum við alheimsátak stofnunarinnar sem kallast Ekkert hungur þar sem unnið er að því að útrýma hungri í heiminum.  Framúrskarandi framlag Petrini á sviði umhverfismála og sjálfbærrar þróunar hefur einnig vakið athygli Sameinuðu þjóðanna sem tilnefndi hann einn tveggja handhafa Champion of the Earth verðlaunanna árið 2013 fyrir „innblástur og aðgerðir“. Færni hans í samskiptum, frumleiki og mikilvægi þeirra skilaboða, sem hann flytur og raungerast í verkefnum Slow Food um allan heim, hafa vakið áhuga alþjóðlegra skoðanamyndandi fólks og fjölmiðla.

Á fundinum í Havarí geta gestir fengið sér hádegisverð og smakkað á Austfirskum krásum.  

Nánari upplýsingar um fundinn veitir Lára Vilbergsdóttir, verkefnastjóri hjá Austurbrú.