Austurbrú mun standa fyrir námskeiðum í íslensku fyrir útlendinga í haust en slík námskeið hafa verið fastur liður í starfsemi okkar síðustu ár og að okkar mati þýðingarmikil fyrir þátttakendur og samfélagið allt.

Námskeiðin hefjast um miðjan september á Egilsstöðum, Seyðisfirði, Reyðarfirði og Neskaupstað. Þau byggja á námskrá í íslensku sem mennta- og menningarmálaráðuneytið gefur út. Haustið 2017 verður boðið upp á námskeið á fyrsta, öðru og þriðja þrepi og auk þess er boðið upp á námskeið í starfstengdri íslensku. Námskeið í starfstengdri íslensku eru haldin í samstarfi við vinnuveitendur og aðlöguð þörfum vinnustaðarins.

„Við höfum haldið svona námskeið síðustu ár og teljum þau afar þýðingarmikil bæði fyrir þátttakendur og samfélagið allt,“ segir Líneik Anna Sævardóttir sem heldur utan um námskeiðið fyrir hönd Austurbrúar auk Jóneyjar Jónsdóttur. „Tungumálið er lykillinn að samfélaginu og aukin færni í íslensku eykur möguleika fólks af erlendu bergi brotnu til þátttöku í samfélaginu. Hinu má þó ekki gleyma að fólk verður ekki altalandi í íslensku eftir námskeiðin. Það kemst vissulega af stað en svo hvílir ábyrgð á okkur hinum, sem tölum íslensku, að ræða við innflytjendurna og gefa þeim þannig tækifæri á að spreyta sig. Slík æfing er forsenda þess að læra nýtt tungumál,“ segir hún.

Stefnt er að því að halda fleiri námskeið í vetur og á fleiri stöðum. Áhugasamir eru hvattir til þess að hafa samband við Austurbrú. Jafnframt hvetjum við þá er þekkja til fólks sem nýtt gæti námskeiðið að benda á þennan möguleika.

Að jafnaði eru námskeiðin 40 klukkustundir og kosta 45.000 kr. Athugið að fyrirtæki og einstaklingar geta sótt um styrki fyrir námskeiðsgjaldi í starfsmenntasjóði.

Nánari upplýsingar um einstök námskeið og skráning. 

Nánari upplýsingar veita:

Jóney Jónsdóttir // 470 3809

Líneik Anna Sævarsdóttir // 470 3820

Sjá auglýsingu:

Námskeið Íslenska fyrir innflytjendur

Icelandic courses

Język islandzki dla obcokrajowców