Sú hraða þróun sem hefur átt sér stað í ferðaþjónustu á Íslandi felur í sér áskorun um betri stjórnun á ýmsum þáttum en ekki síður skapar hún ótal tækifæri sem brýnt er að nýta til hins ýtrasta.  

Um nokkurt skeið hefur verið í gangi undirbúningsvinna fyrir DMP – Destination Management Plan eða áfangastaðaáætlanir á landsvísu.

Hvað er DMP ?

DMP er heildstætt ferli þar sem litið er til skipulags og samhæfingar í þróun og stýringu allra þeirra þátta sem geta haft áhrif á upplifun ferðamanna á viðkomandi svæði/áfangastað, þar með talið þarfir gesta, heimamanna, fyrirtækja og umhverfis.  þarfir gesta, heimamanna, fyrirtækja og umhverfis. Þessar áætlanir eru unnar út frá hverju landsvæði fyrir sig. Austurbrú stýrir DMP vinnu fyrir Austurlandi í samstarfi við Ferðamálastofu. Innan Austurbrúar eru það allnokkrir aðilar sem koma að vinnunni og er DMP áætlun fyrir Austurland byggð á vinnu sem átt hefur sér stað síðastliðin 3 ár í verkefninu Áfangastaðurinn Austurland.

Dæmi um atriði sem reifuð eru í slíkri áætlun væru t.d.:

• Framtíðarsýn áfangastaðarins.
• Markaðsgreining.
• Kortlagning þjónustu á svæðinu.
• Skipulagning á upplýsingaveitu til ferðamanna.
• Forgangsröðun í uppbyggingu áfangastaða.
• Áætlun um þann fjölda sem hver og einn áfangastaður innan svæðis getur borið á hverjum tíma.
• Áætlun um uppbyggingu grunngerðar og stýringu umferðar um svæðið til að lágmarka hættu á því að þolmörkum sé náð.
• Áætlun um tekjuöflun/gjaldtöku á svæðinu.
• Áætlanir á sviði gæða-, umhverfis- og öryggismála.
• Hvað má og hvað má ekki?

 Af hverju DMP? 

Með áfangastaðaáætlun fyrir Austurland verður til heildræn stefna unnin á forsendum svæðisins. Það eflir samstöðu og slagkraft út á við. Einnig verður til skýr forgangsröðun verkefna innan svæðis og heildræn áætlanagerð á landsvísu. Sameiginleg sýn unnin á forsendum svæðanna eflir samstöðu og slagkraft út á við.

Sveitarfélög á Austurlandi hafa komið að vinnunni frá upphafi og einn fulltrúi frá hverju sveitarfélagi tekur þátt í vinnuhóp sem kallast markaðsráð sveitarfélaganna. Þar er m.a. DMP vinnan rædd sem og aðrar áherslur fyrir svæðið. Einnig er búið að mynda stýrihóp í kringum DMP vinnuna sem samanstendur af fulltrúum frá sveitarfélögum, fyrirtækjum og frumkvöðlum á svæðinu.

 Í lok október var haldin vinnustofa í Sláturhúsinu á Egilsstöðum undir yfirskriftinni  Áfram veginn – Áfram Austurland. Sú vinnustofa er liður í innleiðingu og kennslu á verkfærum sem unnin hafa verið sl. ár. Einnig var farið yfir áherslur í stefnumótun fyrir svæðið og hönnun í ferðaþjónustu. Íslandsstofa kynnti markhópagreiningu á fundinum og Íslenski Ferðaklasinn og Nýsköpunarmiðstöð Íslands kynntu Ratsjána og Start-up Tourism.  Góð mæting var á vinnufundinn og um 50 ferðaþjónustuaðilar skráðir.  

Einnig er rannsókn í gangi á viðhorfum heimamanna til Austurlands sem búsetu- og ferðamannastaðar. Sambærileg könnun var framkvæmd árið 2015. Um 900 svör hafa borist. Niðurstöður verða kynntar í desember.  Þessi könnun mun nýtast vel í DMP vinnunni sem er framundan í tengslum við áskoranir tengdum ferðaþjónustu.

Áætlað er að DMP áætlun fyrir Austurland verði tilbúin um mitt ár 2018.