Tónlistarhátíðin Eistnaflug hefur gerst aðili að Austurland* hjá Austurbrú. „Það eru miklir möguleikar fólgnir í samstarfi við hátíð eins og Eistnaflug sem trekkir mikinn fjölda gesta austur, bæði innlenda og erlenda,“ segir María Hjálmarsdóttir, verkefnastjóri hjá Austurbrú.

Síðasta haust tóku nýir samstarfssamningar, undir nafninu Austurland*, gildi í stað fyrri þjónustusamninga Austurbrúar. Markmið nýs fyrirkomulags er að efla samkeppnisstöðu Austurlands með víðtæku samstarfi ríkis, sveitarfélaga, stofnana, fyrirtækja og einstaklinga um verkefni er stuðla að framþróun svæðisins. Áherslur samstarfsins eru sem fyrr atvinnuþróun, Áfangastaðurinn Austurland, menning, menntun og fræðsla og að efla fjórðunginn sem búsetukost.

Það er mikill akkur í því fyrir Austurbrú að eiga í formlegu samstarfi við tónlistarhátíðina Eistnaflug sem hefur á síðustu árum vaxið og dafnað og hægt og bítandi orðið ein af þekktari tónlistarhátíðum landsins.  Í fyrra vann hún bæði Eyrarrósina, sem er viðurkenning fyrir framúrskarandi menningarverkefni á starfssvæði Byggðastofnunar, og Íslensku tónlistarverðlaunin sem tónlistarhátíð ársins.

María Hjálmarsdóttir, verkefnastjóri hjá Austurbrú, kveðst ánægð að fá Eistnaflug til liðs við Austurland* en fyrir eru nokkrir tugir fyrirtækja, aðallega ferðaþjónustufyrirtækja, sem gert hafa samstarfssamning við Austurbrú. Eistnaflug er fyrsta tónlistarhátíðin sem gerir samstarfssamning við stofnunina.  

„Það eru miklir möguleikar fólgnir í samstarfi við hátíð eins og Eistnaflug sem trekkir mikinn fjölda gesta austur, bæði innlenda og erlenda,“ segir hún. „Ég er sannfærð um að hátíð eins og Eistnaflug mun vaxa enn frekar ef Austfirðingar vinna saman að því að gera hana enn betri. Ein helsta sérstaða hátíðarinnar er staðsetning hennar austur á landi og ég er sannfærð um að í sameiningu getum við skapað ógleymanlega upplifun fyrir tónleikagesti þar sem blandað er saman einstakri náttúru, afþreyingu og vitaskuld frábærri tónlist.“

Karl Óttar Pétursson, framkvæmdastjóri Eistnaflugs, tekur í sama streng og María: „ Við erum mjög spennt að vinna með Austurbrú og teljum mikla möguleika með slíku samstarfi fyrir Eistnaflug og Austurland.“

Fræðast má meira um samstarfssamninga við Austurbrú hér.

Myndatexti: Helga Dóra og Karl Óttar hjá Eistnaflugi ásamt Maríu Hjálmarsdóttur hjá Austurbrú (fyrir miðju).