Helgina 10. – 11. febrúar næstkomandi er íbúum, fjarbúum og öðrum hagsmunaaðilum á Borgarfirði eystri boðið til íbúaþings. Þingið markar upphaf að samtali við íbúa í verkefni Byggðastofnunar í svokölluðum „brothættum byggðum“, en umsókn Borgarfjarðarhrepps um þátttöku í verkefninu var samþykkt í ágúst síðastliðnum. Verkefnið er samstarfsverkefni íbúa á Borgarfirði, sveitarfélagsins, SSA, Austurbrúar og Byggðastofnunar. Fulltrúar þessara aðila skipa verkefnisstjórn.

Íbúaþingið er haldið til að vera verkefnisstjórninni veganesti fyrir byggðaþróunarverkefni á Borgarfirði eystri, sem standa mun í allt að fjögur ár og eru skilaboð og áherslur íbúa þungamiðja vinnunnar.

Þingið stendur í tvo daga og er ekki fyrirfram mótuð dagskrá, heldur geta allir viðstaddir stungið upp á umræðuefnum, sem síðan eru rædd í smærri hópum. Aðferðin kallast Opið rými, eða Open Space á ensku, á sér rúmlega 30 ára sögu og hefur gefist vel á íbúaþingum sem þessum. Umsjón með íbúaþinginu hefur Sigurborg Kr. Hannesdóttir, hjá ILDI.

Dagskráin stendur frá kl. 11 – 16 á laugardeginum 10. febrúar og frá kl. 11 – 15, sunnudaginn 11. febrúar. Að þingi loknu er boðið upp á kaffiveitingar og meðan á þinginu stendur verður séð til þess að allir hafi nóg að bíta og brenna. Ekki er nauðsynlegt að vera alla helgina, heldur er hægt að taka þátt í skemmri tíma.

Eru íbúar og aðrir sem tengjast Borgarfirði eystri og bera hag byggðarlagsins fyrir brjósti, hvattir til að velta fyrir sé umræðuefnum og fjölmenna til íbúaþings í febrúar.