Ársfundur Sjálfbærniverkefnisins 2018 verður haldinn á Hótel Héraði, Egilsstöðum þriðjudaginn 8. maí kl. 14:00-18:00. Yfirskrift fundarins er „Hagnýting í þágu samfélagsins“ og stóra spurningin er hvernig Sjálfbærniverkefnið geti nýst Austurlandi best.

Þetta er áttundi ársfundur verkefnisins og umfjöllunarefnið að þessu sinni hvernig verkefnið geti nýst Austurlandi best. Á fundinum verða erindi frá sveitarfélögunum Fjarðabyggð og Fljótsdalshéraði og Austurbrú þar sem horft verður til framtíðar og ýmsum flötum á hagnýtingu verkefnisins velt upp.  Gestafyrirlesari að þessu sinni er Vífill Karlsson, dósent við Háskólann á Akureyri og ráðgjafi hjá Samtökum sveitarfélaga á Vesturlandi.

Að loknum fyrirlestrum verður hópastarf þar sem  rætt verður hvort og hvernig Sjálfbærniverkefnið getur þróast og nýst samfélaginu sem upplýsingaveita á fjölbreyttum sviðum.  Að lokum verður innlegg frá Landsvirkjun og Fjarðaáli. Árni Óðinsson segir frá framkvæmd virkjanaleyfis og HSAP-úttekt á Fljótsdalsstöð og Dagný Björk Reynisdóttir segir frá samfélagsskýrslu Fjarðaáls og GRI-vottun.

Sínum augum lítur hver á silfrið  

Gestafyrirlesari er sem fyrr segir Vífill Karlsson. Hann hefur í nokkur ár rannsakað búsetuskilyrði landshluta og hvað fólk telur til lífsgæða. Könnun hefur verið gerð á þriggja ára fresti frá 2004. Upphaflega náði hún einungis til Vesturlands en síðasta könnun náði til allra landshluta nema Austur- og Norðausturlands.

Niðurstöður rannsóknanna gefa upplýsingar um það hvaða þættir eru mikilvægastir fyrir íbúa varðandi áframhaldandi búsetu úti á landi og verður áhugavert að skoða það í samhengi við Sjálfbærniverkefnið.

Opin fundur og allir velkomnir

Sjálfbærniverkefni Alcoa Fjarðaáls og Landsvirkjunar var sett á laggirnar til að fylgjast með áhrifum framkvæmda við Kárahnjúkavirkjum og álverið í Reyðarfirði á samfélag, umhverfi og efnahag á Austurlandi. Verkefnið gengur út á að fylgst er með þróun vísa sem í flestum tilfellum eru tölulegir mælikvarðar sem gefa vísbendingu um þróun umhverfismála, efnahags og samfélags á byggingar- og rekstrartíma álvers og virkjunar. Miklum upplýsingum hefur nú þegar verið safnað saman og eru aðgengilegar öllum á heimasíðu verkefnisins.

Ársfundir Sjálfbærniverkefnisins hafa hingað til verið fróðlegir og skemmtilegir og veita athyglisverða og forvitnilega sýn á fjórðunginn. Allir eru velkomnir á fundinn á Hótel Héraði en við minnum fólk á að skrá sig á www.sjalfbaerni.is/

Nánari upplýsingar um ársfundinn og Sjálfbærniverkefnið veitir Sigrún Víglundsdóttir hjá Austurbrú. 470 3831 // [email protected]