Guðlaug Björgvinsdóttir hefur verið ráðin til Austurbrúar. Hún mun gegna starfi verkefnastjóra og mun einkum sinna fræðslumálum og símenntun. Starfsstöð hennar verður á Reyðarfirði. 

Guðlaug er 26 ára gömul og býr á Reyðarfirði. Hún er Austfirðingur í húð og hár. Fædd á Djúpavogi og bjó þar fyrstu sex ár ævi sinnar þegar hún flutti með fjölskyldu sinni til Reyðarfjarðar hvar hún býr enn þann dag. Hún er með B.A. próf í félagsvísindum frá Háskólanum á Akureyri en hún útskrifaðist í vor. Guðlaug hefur áður starfað sem leiðbeinandi í leikskólanum Lyngholti á Reyðarfirði og hefur tekið að sér ýmis konar verktöku m.a. fyrir Menntavísindastofnun og Félagsvísindastofnun.

Hún segir að nýja starfið leggist vel í sig: „Ég þekki starfsstöðina á Reyðarfirði ágætlega,“ segir hún. „Ég notaði aðstöðuna þarna í mínu námi og þekki starfsemina og starfsfólkið vel. Ég hlakka til að takast á við þetta verkefni.“

Guðlaug mun hefja störf 13. ágúst og við bjóðum hana velkomna til Austurbrúar.