„Þetta er fyrsta hátíðin og sem vonandi er komin til að vera og verður enn öflugri á næstu árum,“ segir Signý Ormarsdóttir um menningarhátíð barna- og ungmenna (BRAS) sem sett verður á laugardaginn og stendur út september í samtali við fréttavefinn Austurfrétt. 

BRAS verður sett á þremur stöðum á Austurlandi á sama tíma á laugardaginn, en mun að mestu fara fram í menningarmiðstöðvunum í fjórðungnum. Þessa vikuna verða fjölbreyttar smiðjur fyrir öll börn í leikskólum og grunnskólum Fjarðabyggðar. Einkunnarorð hátíðarinnar er þora, vera, gera og er lögð sérstök áhersla að leyfa börnum að vera þátttakendur í smiðjum ásamt því að njóta listviðburða.

Hátíðin á sér nokkurn aðdraganda

Austurbrú hefur umsjón með verkefninu í samstarfi við Skólaskrifstofu Austurlands og menningarmiðstöðvarnar á Austurlandi; Skaftfell, Menningarmiðstöð Fljótsdalshéraðs/Sláturhúsið og Menningarstofa Fjarðabyggðar. Sveitarfélögin Fjarðabyggð og Fljótsdalshérað hafa unnið menningarstefnu þar sem mikil áhersla er á eflingu menningar fyrir börn og ungmenni. Þessi sveitarfélög verða með listasmiðjur fyrir skóla og viðburði á hátíðinni og hafa lagt til bæði vinnu og fjármagn í BRAS.

Sjá umfjöllun Austurfréttar.