BRAS er nýstofnuð menningarhátíð barna og ungmenna á Austurlandi. Einkunnarorð hátíðarinnar er Þora! Vera! Gera! Hátíðin var haldin allan septembermánuð víðsvegar um Austurland. Í boði var fjölbreytt dagskrá með vinnusmiðjum, leiksýningum, tónleikum og myndlistarsýningum í samstarfi við fjölmargar stofnanir.

Á Austurlandi líkt og víða annarsstaðar hefur verið horft til uppbyggingar barnamenningar síðustu ár. Fylgst hefur verið með þróun og uppbyggingu í Reykjavík og nágrenni auk þess sem horft hefur verið til Norðurlandanna varðandi það hvernig er unnið að barnamenningu. Menningarstefna ríkisins vann aðgerðaráætlun fyrir barnamenningu og til varð verkefnið List fyrir alla sem er mikilvægt verkefni fyrir barnamenningu á öllu landinu. „List fyrir alla er ætlað að velja og miðla listviðburðum til barna og ungmenna um land allt og jafna þannig aðgengi barna á grunnskólaaldri að fjölbreyttum og vönduðum listviðburðum óháð búsetu og efnahag. Höfuðáhersla er lögð á list fyrir börn og list með börnum“ (Tekið af heimasíðu verkefnisins).

Til að mæta þessari þróun hefur Austurbrú unnið að uppbyggingu  barnamenningar í nokkurn tíma. Með því m.a. að kynna sér þróun barnamenningar bæði innanlands og erlendis. Í kjölfar þeirrar vinnu var á síðast liðnum vetri haldið málþing á vegum Austurbrúar sem hét Kúltiveraðir krakkar. Erindi á málþinginu héldu nokkrir aðilar sem hafa unnið að barnamenningu síðustu ár. Mikil og góð umræða skapaðist um mikilvægi barnamenningar á málþinginu og það að mikilvægt væri að halda barnamenningarhátíð á Austurlandi. Strax hófst undirbúningur að hátíðinni undir stjórn Austurbrúar. Samstarfsaðilar eru Austurbrú, Skólaskrifstofa Austurlands, menningarmiðstöðvarnar á Austurlandi, Skaftfell, Menningarmiðstöð Fljótdalshéraðs, Tónlistarmiðstöð Austurlands auk Menningarstofu Fjarðabyggðar og Fljótsdalshéraðs. Sóknaráætlun Austurland kom að hátíðinni með því að gera BRAS að áhersluverkefni 2018. Auk þess lögðu Samfélagssjóður Alcoa og samstarfsaðilar fjármagn og vinnu í undirbúning og viðburði hátíðarinnar.

Ákveðið var að verja tíma og fjármagni í að vinna útlit „brand“ hátíðarinnar. Vinna var lögð í að finna nafn hátíðarinnar og einkunnarorð. Grafísk vinna fyrir hátíðina var unnin af Svavari Pétri Eysteinssyni (Prins Pólo) og þykir vel hafa tekist til.

Setning hátíðarinnar fór fram laugardaginn 8. september á þrem stöðum á Austurlandi, Eskifirði, Egilsstöðum og Seyðisfirði. Ákveðið var að listamennirnir sem kæmu yrðu ekki á einum stað og öllum stefnt þangað heldur yrði hann/þeir fengnir til að vera með viðburð sinn í gegnum netið á stórum skjá. Með því sýndum við fram á það að hægt væri að horfa á mörgum stöðum í einu og vegalengdir því minni hindranir en ef allir þyrftu að mæta á einn stað. Listamaðurinn sem var valinn til að takast á við þetta verkefni var Daði Freyr Pétursson tónlistarmaður. Góð þátttaka var í viðburðunum og mikil stemming á „ballinu“. Stóri tónlistardagurinn fór svo fram 29. september og var lokaviðburður hátíðarinnar. Sem dæmi um viðburði yfir mánuðinn voru Pétur og úlfurinn, Vera og vatnið, smiðjur með KiraKira og Futuregrapher auk „Ferðalag um hundrað ára fullveldi“ með Berglindi sagnakonu og margt fleira.

Menningarmiðstöðvarnar þrjár voru með mjög metnaðarfull fræðsluverkefni allan mánuðinn með góðri þátttöku barna og unglinga á öllum aldri. Farið var með verkefni frá Djúpavogi til Vopnafjarðar og boðið var upp á að nemendur kæmu í miðstöðvarnar til að vinna fræðsluverkefni og njóta sýninganna í miðstöðvunum. Einnig voru sveitarfélögin Fljótsdalshérað og Fjarðabyggð með listasmiðjur í skólum sveitarfélaganna en nýjar menningarstefnur þessara sveitarfélaga leggja áherslu á listfræðslu barna og ungmenna auk þess að efla menningarlæsi.

Samstarfsaðilar eru mjög ánægðir með hátíðina og áhugi er fyrir því að halda aftur BRAS hátíð sem verður yfirfarin og endurbætt áður en blásið verður aftur til leiks.

Hafi einhverjir áhuga á því að kynna sér hátíðina betur er upplagt að líta á heimasíðu BRAS sem er https://www.bras.is/ og facebook/BRASAusturland #BRASAusturland.

Eftir Signýju Ormarsdóttur, verkefnastjóri hjá Austurbrú. Greinin birtist í nýjasta tölublaði Sveitarstjórnartíðinda.