Síðustu daga hefur Íslandsstofa staðið  fyrir vinnustofum í Suður-Evrópu fyrir fyrirtæki í ferðaþjónustu. Á Spáni voru vinnustofurnar haldnar í borgunum Madrid og Barcelona og Páll Guðmundur Ásgeirsson, verkefnastjóri hjá Austurbrú, var fulltrúi Austurlands og kynnti fjórðunginn fyrir spænskum ferðaskrifstofum.

Á vinnustofunum gafst fyrirtækjunum gott tækifæri til að kynna sig og koma á viðskiptasamböndum við suður-evrópska ferðaþjónustuaðila. Páll Guðmundur Ásgeirsson, verkefnastjóri hjá Austurbrú, var fulltrúi Austurlands og hefur haft í nógu að snúast. Hann fór til Spánar um síðustu helgi og sat vinnustofurnar í Madrid og Barcelona í vikunni:

„Það hefur verið talsverð aukning spænskra ferðamanna á Íslandi síðustu ár,“ segir hann. „Spænskar ferðaskrifstofur eru því mjög forvitnar um Ísland, efnahagur landsins verður sífellt betri og Spánverjar eru orðnir duglegri að ferðast.“

„Þetta gengur mjög hratt fyrir sig,“ segir hann um vinnustofurnar en um fimmtán íslensk fyrirtæki tóku þátt. „Við fengum þrjá klukkutíma til að kynna okkur fyrir fjöldanum öllum af gestum sem fæstir höfðu komið til Íslands og voru skiljanlega forvitnir og höfðu margar spurningar um landið okkar. Eðli málsins samkvæmt voru þetta yfirborðskennd samtöl en vonandi nóg til að kveikja áhuga hjá einhverum.“

Páll segist hafa orðið var við að margir voru mjög forvitnir um Austurland. „Þeir sem höfðu yfir höfuð komið til Íslands höfðu fæstir komið austur og vissu lítið um landshlutann okkar. Það var mjög skemmtilegt að kynna fjórðunginn fyrir fólkinu og ég held að það sé þýðingarmikið fyrir okkur að hafa fulltrúa á svona vinnustofu og segja frá því sem við höfum upp á að bjóða.“