Austurbrú er þátttakandi í Erasmus verkefninu „Líf og heilsa“ en þátttökuþjóðirnar eru þrjár: Ísland, Noregur og Ítalía. Verkefnið snýst um heilsueflingu fullorðinna og er byggt í kringum námskrá Fræðslumiðstöðvar atvinnulífsins „Líf og heilsa – lífsstílssþjálfun“.   Markmið námsins er að auka þekkingu námsmanna á áhrifaþáttum heilsu, leikni þeirra í heilsulæsi og hæfni til að taka ábyrgð á eigin heilsu.

Ásamt því að taka þátt í öllum þáttum verkefnisins er meginhlutverk Austurbrúar að prufukeyra námskrána hér á Austurlandi og deila reynslunni til samstarfsaðila. „Þetta er mikilvægt verkefni,“ segir Hrönn Grímsdóttir, náms- og starfsráðgjafi, en hún stýrir verkefninu fyrir hönd Austurbrúar auk Sigrúnar Víglundsdóttur. „Lífsstílssjúkdómar eru stórt vandamál og það skortir langtímaúrræði. Með þessu verkefni er þróuð heildræn nálgun þar sem tekið er á öllum þáttum hvort sem þeir snúa að andlegri heilsu, mataræði eða hreyfingu.“

Verkefnið hófst formlega í september en lýkur sumarið 2020 með ráðstefnu í Reykjavík þar sem niðurstöður þess verða kynntar.

Austurbrú mun hafa umsjón með tveimur hópum í vetur þar sem stuðst verður við námskrána.  „Við fylgjumst með hópunum í tiltekinn tíma og metum árangurinn,“ segir Hrönn en í vetur er m.a. fyrirhuguð vinnuferð til Noregs þar sem samstarfsþjóðirnar bera saman bækur sínar.   SÍBS átti frumkvæði að verkefninu og fer með verkefnisstjórn.