Markaðsstofur landshlutanna, í samstarfi við flugfélagið Erni, setja upp ferðasýninguna Mannamót í sjötta sinn 17. janúar næstkomandi. Tuttugu og sjö austfirsk fyrirtæki tóku þátt í fyrra og nú er von okkar að enn fleiri fyrirtæki á Austurlandi skrái sig til leiks en skráning stendur yfir núna.

Sýningin fer í fyrsta sinn fram í Kórnum í Kópavogi en ekki í flugskýli flugfélagsins Ernis eins og verið hefur. Austurland hefur vakið athygli á Mannamótum síðustu ár fyrir vandaða sýningabása og heildrænt útlit en tuttugu og sjö fyrirtæki voru skráð til leiks í fyrra og hafa aldrei jafn mörg austfirsk fyrirtæki tekið þátt. Er von okkar hjá Austurbrú að við sláum þetta met á næstu Mannamótum og stendur skráning yfir núna.

Ferðaþjónustan á landsbyggðinni kynnt

Mannamót markaðsstofanna er kynningarvettvangur ferðaþjónustunnar á landsbyggðinni og tækifæri til að koma á fundum fagaðila í greininni. Tilgangurinn er að kynna landsbyggðarfyrirtæki fyrir ferðaþjónustuaðilum sem staðsettir eru á höfuðborgarsvæðinu. Ísland hefur mikið upp á að bjóða og Mannamót hjálpar til við að mynda tengsl innan ferðaþjónustunnar. 

Fylgstu með!

Mannamót eru kjörinn vettvangur fyrir aðila í ferðaþjónustu að koma og kynna sér þá fjölbreytni í þjónustu sem er í boði á landsbyggðinni. Því er Mannamót sérstaklega áhugaverður vettvangur fyrir m.a.: 

•            Starfsfólk ferðaskrifstofa og ferðaskipuleggjenda

•            Starfsfólk upplýsinga- og bókunarmiðstöðva

•            Leiðsögumenn

•            Nemendur í leiðsögunámi og ferðamálafræðum ásamt kennurum í ferðamálagreinum

•            Starfsfólk í þjónustuverum flugfélaga

•            Sölu- og kynningarfólk flugfélaga

•            Starfsfólk í mótttökum hótela og gistihúsa

•            Fjölmiðla

Skráning gesta fer fram hér.

Skráning sýnenda fer fram hér. Athugið að einungis samstarfsfyrirtæki markaðsstofanna geta tekið þátt sem sýnendur í Mannamóti 2019. Nánari upplýsingar um samstarf við Austurbrú fást hér. 

Skráningu á Mannamót lýkur 10. janúar 2019. 

Sem fyrr segir verða Mannamót haldin fimmtudaginn 17. janúar 2019 frá kl. 12.00 – 17.00 í Kórnum í Kópavogi.

Nánari upplýsingar veitir Jónína Brynjólfsdóttir í 470 3807 // 899 5892 // jonina (hja) austurbru.is