Þann 28. janúar var veittur 61 verkefnastyrkur úr Uppbyggingarsjóði Austurlands til verkefna sem efla munu atvinnuþróun og menningu í landshlutanum. Heildarupphæð úthlutunar nam rúmum 60 milljónum króna. Þetta er fimmta úthlutun sjóðsins sem hefur það hlutverk að styrkja menningar-, nýsköpunar- og atvinnuþróunarverkefni í samræmi við sóknaráætlun landshlutans.

Alls bárust 116 umsóknir sem er svipaður fjöldi og á síðasta ári. Áætlaður heildarkostnaður verkefna var  560 m.kr. en sótt var um styrki fyrir 180 m.kr, þar af  94 m.kr. til menningarmála og 85 m.kr. til nýsköpunar og atvinnuþróunar.

Til úthlutunar að þessu sinni voru 60.316.000 kr. og veittir 61 styrkur: 30 til menningarmála upp á 27,9 milljónir og 25 styrkir til atvinnuþróunar upp á alls 24 milljónir. Að auki voru veittar 8,2 milljónir til stofn- og rekstarstyrkja á sviði menningar.

Mikill fjölbreytileiki er í verkefnunum eins og áður. Í ár var sérstaklega kallað eftir verkefnum sem tengdust mataruppbyggingu og matarmenningu og hlutu 13 verkefni sem lúta að nýsköpun í matvælaframleiðslu styrki. Má þar nefna hæsta styrk til einstaklings sem ætlaður er til þróunar á vörum úr sauðamjólk, matarleikhús Óbyggðaseturs og matarupplifunarferðamennsku Adventura.

Hæstu styrki hlutu:

Það voru Ásta Kristín Sigurjónsdóttir formaður úthlutunarnefndar Uppbyggingarsjóðs Austurlands og Signý Ormarsdóttir verkefnastjóri hjá Austurbrú, sem afhentu styrkina að þessu sinni.

Athöfnin fór fram í Valaskjálf á Egilsstöðum. Athöfninni stýrði bæjarstjóri Fljótsdalshéraðs Björn Ingimarsson. Ávarp fluttu forseti bæjarstjórnar Fljótsdalshéraðs Stefán Bogi Sveinsson, Ásta Kristín Sigurjónsdóttir formaður úthlutunarnefndar og formaður Sambands sveitarfélaga á Austurlandi Einar Már Sigurðarson.

Nánari upplýsingar má finna hér og hjá Signýju Ormarsdóttur í síma 860-2983 //  [email protected].