Málþing um menningar- og söguferðaþjónustu og tækifæri í henni á Austurlandi 

Menningar- og söguferðaþjónusta á Austurlandi verður í brennidepli á málþingi sem haldið verður á Hótel Héraði, Egilsstöðum miðvikudaginn 27. febrúar kl. 16-18. Framsöguerindi flytja: Signý Ormarsdóttir, verkefnastjóri hjá Austurbrú, sem segir frá afþreyingu sem upplifun í Áfangastaðnum Austurlandi og Elsa Guðný Björgvinsdóttir, forstöðukona Minjasafns Austurlands, sem flytur erindið „Eru þetta ekki allt sömu strokkarnir?” – menningarminjasöfn sem áfangastaðir.

Nemendur í Hagnýtri menningarmiðlun við Háskóla Íslands sem eru á ferð um Austurland þessa dagana fjalla um áhugaverð verkefni annars staðar og ræða það sem þau hafa séð í vettvangsferð sinni. Í lokin verða síðan pallborðsumræður með þátttöku Sumarliða Ísleifssonar, lektors við HÍ og forsvarsmönnum setra og safna á Austurlandi.

Málþinginu stýrir Skúli Björn Gunnarsson, forstöðumaður Gunnarsstofnunar. Að málþinginu standa: Gunnarsstofnun, Háskóli Íslands, Minjasafn Austurlands, Austurbrú, Skálanes, Safnastofnun Fjarðabyggðar, Óbyggðasetur Íslands og fleiri austfirsk söfn og setur. Málþingið nýtur stuðnings úr Uppbyggingarsjóði Austurlands.

Nánari upplýsingar veitir Skúli Björn Gunnarsson, forstöðumaður Gunnarsstofnunar í síma 860-2985 eða netfang [email protected].