Um 40 manns tóku þátt í heilsu- og lífsstílsdegi sem haldinn var í Nesskóla 30. maí sl. Að deginum stóðu Austurbrú og Heilsueflandi Fjarðabyggð. Uppákoman var hluti af Erasmus+ verkefninu Life&Health in health promoting communities og var styrktur af SÚN.

Um morguninn var boðið upp á fríar heilsufarsmælingar og þátttakendur hvattir til að taka þátt í könnun á Heilsugátt SÍBS. Formleg dagskrá hófst svo í hádeginu. Fyrst á mælendaskrá var Hrönn Grímsdóttir, náms- og starfsráðgjafi hjá Austurbrú. Hún sagði frá verkefninu Líf- og heilsa sem Austurbrú tekur þátt í ásamt SÍBS og aðilum frá Noregi og Ítalíu með styrk frá Erasmus+ áætlun Evrópusambandsins. Verkefnið snýst um heilsueflingu og lífsstílsþjálfun fullorðinna og markmið þess er að vekja fólk til umhugsunar um langvinna sjúkdóma og lífsstílstengda áhættuþætti þeirra, auka heilsulæsi og hvetja einstaklinga til heilbrigðs lífsstíls. 

Bjarki Ármann Oddsson, íþrótta- og tómstundafulltrúi Fjarðabyggðar, sagði frá Heilsueflandi Fjarðabyggð. Heilsueflandi samfélag leggur áherslu á að líkamleg, andleg og félagsleg heilsa og líðan íbúa sé höfð í fyrirrúmi við alla stefnumótum. Samningur var gerður við Landlækni um verkefnið árið 2017 og markar það upphaf vinnunnar. Skipta má undirbúningi í sjö skref og þá er Fjarðabyggð nú stödd í öðru skrefi. 

Fyrri gestafyrirlesari dagsins var Sigrún Þuríður Geirsdóttir. Hún var fyrst íslenskra kvenna til að synda ein yfir Ermarsundið eftir að hafa tvisvar tekið þátt í boðsundi yfir. Í gegnum sjósundið hefur hún byggt sig upp frá því að vera „sófakartafla“ yfir í að sigra Ermarsundið sem oft er kallað „Mount Everest“ sjósundfólks. Á leiðinni voru nokkrir minni sigrar, eins og Hvannadalshnjúkur, Viðeyjarsund og Faxaflóasund. Að lokum sýndi Sigrún stutta kvikmynd um sundið.

Seinni gestafyrirlesari dagsins var Elísabet Reynisdóttir, næringarfræðingur. Hún fjallaði um mikilvægi góðrar næringar fyrir heilbrigði og líðan fólks. Grunnorkuþörf meðalmanneskju er u.þ.b. 1500 hitaeiningar á dag og svo bætist við orkuþörf vegna hreyfingar og virkni yfir daginn. Kaloríur segja hins vegar ekki alla söguna og hægt er að vera vannærður í yfirþyngd. Það er einstaklingsbundið hvaða mataræði hentar en öll ættu að drekka vatn við þorsta og borða fimm skammta af ávöxtum og grænmeti á dag.  

Hrönn Grímsdóttir var fundarstjóri og stjórnaði jógaæfingum og slökun á milli atriða. Þá var boðið upp á kaffi og léttar veitingar. 

Að dagskrá lokinni skellti meirihluti fundarmanna, ásamt fleiri sjógörpum, sér í sjósund eins og sjá má á meðfylgjandi mynd.