Úrbótaganga er nýtt verkefni á Austurlandi. Vefurinn urbotaganga.is var opnaður snemma í sumar en þar getur fólk sent inn ábendingar og tillögur án þess að fara í úrbótagöngu. Hann hefur nú þegar verið notaður með góðum árangri. 

Úrbótaganga er nýtt verkefni á Austurlandi. Fyrirmyndin kemur frá Svíþjóð en markmiðið er að bæta ásýnd landshlutans fyrir gesti og íbúa. Þetta er liður í áfangastaðaáætlun Austurlands sem birt var í fyrra og er samstarfsverkefni Austurbrúar og sveitarfélaganna á Austurlandi. Farið er í skipulagða göngu þar sem fólk skrásetur það sem betur má fara og kemur síðan ábendingunum til þess sem ber ábyrgð á að laga og/eða bæta.

„Þetta snýst ekki um að búa til óskalista eða klaga annað fólk,“ segir María Hjálmarsdóttir sem stýrir verkefninu fyrir hönd Austurbrúar. „Tilgangurinn er að benda á það sem auðvelt er að laga í umhverfinu eins og það er og við hvetjum fólk til að leggja til úrbætur sem eru hófsamar og raunsæjar,“ segir hún og bætir við að oftar en ekki sé tiltölulega auðvelt að taka til á atvinnulóðum, þökuleggja, gróðursetja eða rétta við hallandi götuskilti. „Það er margt sem íbúar geta gert sjálfir en annað sem þeir geta hvatt fyrirtæki, verktaka eða sveitarfélög til að framkvæma,“ segir María.

Vefurinn urbotaganga.is var opnaður snemma í sumar en þar getur fólk sent inn ábendingar og tillögur án þess að fara í úrbótagöngu. „Sumir komast ekki í skipulagða göngu af einhverjum ástæðum,“ segir María. „Þess vegna settum við upp þennan vef sem er mjög notendavænn og auðvelt að senda inn tillögur að úrbótum. Það von okkar að íbúar Austurlands taki vel í þessa hugmynd og reyndar landsmenn allir því þetta er aðferðafræði sem hentar öllum, hvar svo sem þeir búa.“

Nú þegar hefur vefurinn verið notaður með góðum árangri. „Snemma í sumar fengum við ábendingu um pramma inni í dal á Eskifirði sem ekki hafði verið fjarlægður eftir að vinnu við nýju Norðfjarðargöngin kláraðist. Myndir voru teknar af honum og haft samband við ábyrgðaraðilann sem nú hefur fjarlægt prammann. Þetta er gott dæmi um hvernig vefurinn virkar til að bæta og fegra umhverfi okkar,“ segir María. 

Næsta úrbótaganga verður á Eskifirði á sunnudaginn.