Úrbótaganga er nýtt verkefni á Austurlandi og má kalla nýsköpunarverkefni þegar kemur að bættri ásýnd samfélagsins á skilvirkan hátt. Fyrirmyndin kemur frá Svíþjóð en markmiðið er að bæta ásýnd landshlutans fyrir gesti og íbúa. Þetta er liður í áfangastaðaáætlun Austurlands sem birt var í fyrra og er samstarfsverkefni Austurbrúar og sveitarfélaganna á Austurlandi. Farið er í skipulagða göngu þar sem fólk skrásetur það sem betur má fara og kemur síðan ábendingunum til þess sem ber ábyrgð á að laga og/eða bæta.

Búið er þróa nýja heimasíðu, Úrbótaganga.is, sem auðveldar almenningi að hafa áhrif til úrbóta í nærumhverfi og á svæðinu öllu. Íbúar kanna umhverfi sitt og koma upplýsingum um það sem betur má fara á framfæri með auðveldum og skilvirkum hætti.  

María Hjálmarsdóttir, verkefnastjóri Austurbrúar, kynnti verkefnið á haustþingi Sambands sveitarfélaga á Austurlandi sem fram fór á Borgarfirði eystri um liðna helgi. „Þú þarft ekki að mæta í skipulagða hópgöngu – þú getur farið einn í göngutúr. Þú gengur og punktar niður, eða jafnvel myndar, það sem betur má fara. Þetta geta verið allskyns atriði, allt frá brotnum kantsteini til heillar byggingar sem er að drabbast niður. Ábendingarnar sendirðu síðan inn í gegnum heimasíðuna okkar. Þannig þarftu ekki að tala við nokkurn mann til að senda inn tillögu um úrbót – frekar en þú vilt.“

Farið er yfir allar ábendingarnar sem berast og þeim komið til ábyrgðaraðila. Ábendingar til fyrirtækja verða ekki birtar á síðunni heldur verður þeim sent hvatningarbréf í kjölfarið. Nú þegar hefur vefurinn verið notaður með góðum árangri. „Snemma í sumar fengum við ábendingu um pramma inni í dal á Eskifirði sem ekki hafði verið fjarlægður eftir að vinnu við nýju Norðfjarðargöngin kláraðist. Myndir voru teknar af honum og haft samband við ábyrgðaraðilann sem fjarlægði prammann í lok sumars. Þetta er gott dæmi um hvernig vefurinn virkar til að bæta og fegra umhverfi okkar,“ segir María.