Austurbrú þakkar öllum sem tóku þátt í Dögum myrkurs 2019. Þátttakan fór fram úr okkar björtustu vonum og má segja að heldur betur hafi lifnað yfir svæðinu rétt áður en hátíðin hófst og viðburðir voru enn að bætast við á meðan hún stóð yfir. Allir byggðarkjarnarnir tóku þátt að einhverju leyti, sumir tóku þetta alla leið og voru með fjölbreytta dagskrá alla dagana, á meðan aðrir voru með minna í boði en tóku samt þátt. Auk þess bárust okkur fregnir af grunn- og leikskólum í a.m.k. sjö byggðakjörnum sem tóku þátt, ásamt fjölda félagsmiðstöðva og félagasamtaka. Fyrirtæki í fjórðungnum sáu hag sinn í því að bjóða uppá alls konar skemmtileg, drungaleg, draugaleg og hræðileg tilboð og veit ég til þess að íbúar voru almennt duglegir að nýta sér þau.

Þátttakan í ljósmyndasamkeppninni var góð og bárust fjölmargar myndir í keppnina. Dómnefndin hittist í síðustu viku og var það hennar mat að mynd Guðnýjar Láru Guðrúnardóttur, frá Seyðisfirði, hefði fangað best þemað Manneskjan í myrkrinu. Guðný segist hafa sent myndina inn af því að henni hafi fundist hún passa vel við þemað og í hennar huga geti þessi hátíð kennt börnum að margt skemmtilegt geti gerst í myrkrinu. Alls konar ævintýri geta sprottið fram og að það sé óþarfi að vera hræddur við myrkrið, eins og mörg börn eru. Af þeirri ástæðu nefndi hún myndina Í myrkrinu leynast ævintýri.

Að lokum minnum við á að Dagar myrkurs verða haldnir hátíðlegir 28. október til 1. nóvember 2020. Við getum strax farið að hlakka til!

Verkefnastjóri Daga myrkurs er Halldóra Dröfn Hafþórsdóttir ([email protected])