Haustfundur ferðaþjónustunnar var haldinn í Sláturhúsinu á Egilsstöðum fimmtudaginn 14. nóvember. Fundurinn var á vegum Áfangastaðarins Austurland og var mjög vel sóttur en 90 manns voru í húsinu þegar mest lét. Markmið fundarins var margþætt: kynning á uppfærslu áfangastaðaáætlunar fyrir verkefnið Áfangastaðurinn Austurland, tengslamyndun og vinna við áherslurnar sköpun, menning, matur, leiðangrar og útivist. Í hádegishléi kynntu austfirsku fyrirtækin Askur, Austri, Beljandi, Nielsen, Salt og veitingastaður Vök vörur sínar.

ERINDI

Á fundinum var fjöldi áhugaverðra erinda fluttur. Glærur fyrirlesarana má nálgast hér að neðan.  

Jónína Brynjólfsdóttir, verkefnastjóri hjá Austurbrú:  
– Sækja PDF

Lilja Rögnvaldsdóttir: Ferðavenjukönnun sem fór fram á Egilsstöðum sumarið 2018.
– Sækja PDF 

Eyrún Jenný Bjarnadóttir: könnunar um viðhorf heimamanna til ferðaþjónustu sumarið 2018.
– Sækja PDF 

Ásta Kristín Sigurjónsdóttir, framkvæmdastjóri Íslenska ferðaklasans: Verkefnið „Ábyrg ferðaþjónusta“.
– Sækja PDF 

Inga Rós Antoníusdóttir, verkefnastjóri hjá Ferðamálastofu: Verkefnið „Stafrænt þróun“.
– Sækja PDF

Inga Hlín Pálsdóttir, forstöðumaður áfangastaðarins hjá Íslandsstofu: Stefnuáherslur í markaðssetningu fyrir ferðaþjónustuna
– Sækja PDF

María Hjálmarsdóttir, verkefnastjóri hjá Austurbrú og Daniel Byström, áfangastaðahönnuður: Áfangastaðaáætlun og hugvekja inn í vinnustofur.
– Sækja PDF

VINNUSTOFUR

Að framsögum loknum var boðið upp á vinnustofur. Skipuleggjendur lögðu til þemun sýnileika Austurlands annars vegar og nýsköpun og vöruþróun hins vegar. Þátttakendum var frjálst að stinga upp á fleiri þemum og þá bættust þrír hópar við: menning, matur og útivist. María Hjálmarsdóttir, verkefnastjóri Áfangastaðarins Austurlands, segir stuttlega frá umræðum í vinnustofunum: 

„Í menningarhópnum fóru fram virkilega líflegar og skemmtilegar umræður. Þáttttakendur voru sammála um að mikið menningarstarf væri unnið á svæðinu og margt í boði en oft vantaði upp á sýnileikann. Hér væru ýmis tækifæri, m.a. í söfnunum, sérferðum og umhverfislist.

Í matarhópnum var mikil áhersla lögð á sjálfbærni og að ferskur matur af svæðinu sé aðgengilegri fyrir bæði íbúa og gesti. Hugmyndir um matarmarkaði voru ræddar og jafnvel markaðsbíl sem flytur matvæli um fjórðunginn. Margir töldu nauðsynlegt að leyfa heimaslátrun til að ýta undir kaup beint frá býli og reynsluna sem komin er á innflutning ávaxta og grænmetis í gegnum Seyðisfjörð.

Nýsköpunar- og vöruþróunarhópurinn vildi taka næstu skref, tengja betur við söguna okkar og menninguna, nýta tæknina betur og þróa ferðaþjónustuna í takt við markhópa svæðisins. Mikið var rætt um Stuðlagil, einn vinsælasta ferðamannastaðinn á Austurlandi síðustu misserin. 

Í hópnum sem ræddi um sýnileika Austurlands var horft til þess að hafa nafn fjórðungsins sýnilegra og hvetja til þess að það verði meira notað, bæði rafrænt og áþreifanlegum hlutum eins og skiltum. Hópurinn vildi þannig tengja betur við vörumerkið og áfangastaðaverkefnið. Fram undan hjá okkur hjá Austurbrú er t.d. að búa til betri verkfæri og leiðbeiningar, t.d. um notkun á merki áfangastaðarins. Áhugi var á að vera duglegri við að miðla sögum, virkja t.d. skólana, segja börnum frá þeirra nærumhverfi og töfrum þess.

Hópurinn sem fjallaði um útivist taldi mikilvægt að laga merkingar gönguleiða og skýra hvar ábyrgð í því samhengi liggur. Betra væri að hafa leiðirnar færri og merkja þær vel. Vilji er til að tengja gönguleiðir saman og markaðssetja. Samstarf við göngufélögin er þar mjög mikilvægt. Bókin 101 Austurland veitir frábært yfirlit yfir gönguleiðir í fjórðungnum. Hópurinn vildi einnig kortleggja fjallahjólaleiðir á Austurlandi og leggja meiri áherslu á vetrarútivist, s.s. gönguskíði og fjallaskíði með skinnum.

Þetta var, eins og heyra má, mjög fjölbreytt og áhugaverð vinna,“ segir María.

Inga Hlín Pálsdóttir, forstöðumaður áfangastaðarins hjá Íslandsstofu, var ánægð að fundi loknum: „Það var virkilega gaman að taka þátt í fundinum. Sú vinna sem hefur verið unnin síðustu ár í mörkun Austurlands er frábær og maður finnur hversu mikla samstöðu hún myndar á svæðinu. Við hjá Íslandsstofu hlökkum til þess að vinna áfram með ferðaþjónustunni á svæðinu við að efla áfangastaðinn til framtíðar.”