Á undanförnum vikum hefur Austurbrú haft forgöngu um að kalla saman aðila sem koma á einn eða annan hátt að áfallaþjónustu á Austurlandi. Forsögu þessarar vinnu má rekja til ályktunar haustþings Sambands sveitarfélaga á Austurlandi sem haldið var á Borgarfirði eystri í október. Í ályktun fundarins um geðheilbrigðismál má m.a. lesa eftirfarandi: „[…] blasir við að mikið fjármagn vantar í þennan málaflokk, en lýðheilsuvísar Landlæknis benda til þess að staða geðheilbrigðismála á Austurlandi sé mjög alvarleg og fari versnandi. Þingið ítrekar mikilvægi þess að ekki viðgangist mismunun á grundvelli búsetu á aðgengi að grunnþjónustu í geðheilbrigðismálum á Íslandi. Í því ljósi er mikilvægt að formfesta samráð aðila sem veita þjónustu á þessu sviði og ráðast í gerð aðgerðaráætlunar með það að leiðarljósi að íbúar sem á þjónustu þurfa að halda fái úrlausn sinna mála.”

Fyrsta skrefið í þessu samstarfi var vinnustofa sem Austurbrú stóð fyrir fyrr í mánuðnum. Þar komu viðbragðsaðilar saman og fóru yfir stöðu áfallaþjónustu í landshlutanum. Fjóla María Árnadóttir frá Sambandi íslenskra sveitarfélaga flutti við það tækifæri fyrirlestur um verkferli sem kallað er notendamiðuð þjónustuhönnun og er t.a.m. mögulegt að nota til að greina núverandi stöðu áfallaþjónustu á Austurlandi og í framhaldinu hvar tækifæri eru til úrbóta.

Hópurinn er skipaður tuttugu einstaklingum sem koma að áfallaþjónustu á ýmsum stigum. Í honum sitja fjórir aðilar frá Heilbrigðisstofnun Austurlands, þ.e. fagstjóri á heilsugæslu- og sjúkrasviði, yfirsálfræðingur, skólahjúkrunarfræðingur og hjúkrunarfræðingur geðteymis, auk aðalvarðstjóra lögreglunnar á Austurlandi, slökkvistjóraSlökkviliðs Fjarðabyggðar, fulltrúa björgunarsveita og sjúkraflutningamanna, fulltrúa Rauða Kross Íslands, félagsmálastjóra og fulltrúa frá barnavernd Fjarðabyggðar, félagsmálastjóra og fulltrúa frá heimaþjónustu Fljótsdalshéraðs, sálfræðings frá Skólaskrifstofu Austurlands, beggja skólameistara Verkmenntaskóla Austurlands og Menntaskólans á Egilsstöðum, prests úr Austfjarðaprestakalli og framkvæmdastjóra og tveggja verkefnastjóra frá Austurbrú.

Um miðjan febrúar mun hópurinn koma aftur saman til áframhaldandi vinnu með það að markmiði að gera áfallaþjónustu á Austurlandi aðgengilegri og skilvirkari fyrir íbúa.

Arnfríður Eide Hafþórsdóttir, verkefnastjóri hjá Austurbrú, heldur utan um úrvinnslu þessarar vinnustofu og veitir frekari upplýsingar.
[email protected] // 470 3828