Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, og Guðmundur Ingi Guðbrandsson, umhverfis- og auðlindaráðherra, gerðu í gær grein fyrir úthlutun fjármuna til uppbyggingu innviða, náttúruverndar og annarra verkefna á ferðamannastöðum árið 2020. Tæpar 164 milljónir koma í framkvæmdir á Austurlandi.

Úthlutað var um 1,5 milljarði króna úr Landsáætlun um uppbyggingu innviða og Framkvæmdasjóði ferðamannastaða sem gerir kleift að halda áfram því mikilvæga verkefni að byggja upp innviði á ferðamannastöðum. Tæpar 164 milljónir koma í framkvæmdir á Austurlandi, þar af um 100 milljónir í uppbyggingu við Stuðlagil en eftirfarandi verkefni að austan fengu styrk:  

• Fuglastígur á Norðausturlandi – Bygging skýla til náttúruskoðunar (annar áfangi) Kr. 23.054.800,- styrkur til að byggja fuglaskoðunarskýli við Nýpslón í Vopnafirði, fuglaskoðunarskýli við Skoruvíkurbjarg á Langanesi, fugla- og selaskoðunarskýli við Bakkahlaup í Öxarfirði og skýli til fuglaskoðunar og útivistar í Skipshólma á Vopnafirði ásamt göngustíg þangað. Verkefnið byggir á sérstöðu Norðausturlands sem eins fjölbreytilegasta fuglaskoðunarhéraðs landsins. Verkefnið sameinar náttúruvæna ferðamennsku og snjalla hönnun og er til þess falli að auka ferðamennsku á veiku svæði og á veikri árstíð.
• Marteinn Óli Aðalsteinsson – Gönguleiði – Stuðlafoss – Stuðlagil Kr. 23.139.540 ,- styrkur til að gera tvo stíga frá Stuðlafossi að Eyvindará við Stuðlagili, annar stígurinn er ætlaður til göngu og á að liggja meðfram árbakkanum. Hinn stígurinn er ætlaður til göngu og einnig fyrir farartæki svo sem bíla eða fjórhjól og sinnir því öryggishlutverki. Hvor leið er um 2,6 km sem þarf grunnvinnu og efnisskipti en til stendur að hafa möl á stíg. Setja þarf hólk í Fossá og göngubrú yfir Víðidalsá sem eru á þessari leið. Einnig verða sett upp upplýsingaskilti og vegvísun. Verkefnið stuðlar að bættri umgengni á mjög viðkvæmu svæði sem er orðið mikið aðdráttarafl í ferðamennsku ásamt því að stuðla að auknu öryggi ferðamanna.
• Baggi ehf. / Bragðavellir Cottages – Göngustígagerð að Snædalsfossi og Gömlubrú Kr. 9.109.200,- styrkur til að stýra umferð gangandi eftir göngustígum að Snædalsfossi og þar með vernda viðkvæman mosagróður, sem er á svæðinu. Verkefnið snýr að verndun viðkvæmrar náttúru og gerð göngustíga. Það rímar því vel við meginmarkmið sjóðsins. Styrkur er veittur með fyrirvara um samþykkt deiliskipulag. 
• Ferðafélag Fljótsdalshéraðs – Vernd náttúru og bætt öryggi gesta á Víknaslóðum Kr. 3.501.680,- styrkur til að vernda náttúru og bæta öryggi gesta á Víknaslóðum sem er helsta göngusvæði Austurlands og nær frá Héraðsflóa að Seyðisfirði. Fyrirhugað er að stika upp á nýtt þrjár leiðir í Stórurð á Víknaslóðum og gönguleiðina yfir Gönguskarð í Njarðvík. Á svæðinu þarf einnig að setja upp vegvísa og göngubrýr og flytja leiðir þar sem náttúran er farin að láta verulega á sjá á sumum stöðum. Skilti verða einnig sett upp í Stórurð, eitt við hverja inngönguleið í Urðina sem sýnir hringleiðina í urðinni til að fólk fari ekki að ganga utan stíga. Verkefnið snýst um að bæta öryggi ferðamanna og vernda náttúru á mjög vinsælu útivistarsvæði.
• Jökuldalur slf. – Stuðlagil, öryggi og náttúruvernd og hreinlætisaðstaða Kr. 80.165.356,- styrkur til að bæta aðgengi og hreinlætisaðstöðu við Stuðlagil. Verkefnið er í megin atriðum tvíþætt; 1) að setja upp stigakerfi og útsýnispall í gilinu að Stuðlagili sem búið er að hanna og er í smíðum. 2) Að kaupa og setja upp salerni. Jafnframt þarf að bæta við bílastæði. Mjög verðugt innviðaverkefni, sem að stuðlar að auknu öryggi ferðamanna og bættri umgengni á viðkvæmu svæði. Styrkur er veittur með fyrirvara um samþykkt deiliskipulag og veitingu framkvæmdaleyfis.
• Fljótsdalshérað – Öryggi gesta við Hafrahvammagljúfur Kr. 14.327.800,- styrkur til að smíða útsýnispall til stýra gestum á ákveðinn útsýnisstað og vinna þannig gegn hraphættu á gljúfurbrúninni. Eins er áformað að leggja stiga ofan í Hvammana til að bæta aðgengi fyrir gesti og sjúkraflutningafólk og auka fjölbreytni gönguleiðar. Að auki er þörf á því að setja upp stök þrep ofan í Hvömmunum í brekku þar sem hætta á hrösun er nokkur og rask á gróðri orðið töluvert. Um er að ræða verðugt verkefni, sem að bætir öryggi ferðamanna til muna á ferðamannastað, þar sem skapast geta varasamar aðstæður.
• Seyðisfjarðarkaupstaður – Göngustígakerfi í Seyðisfirði: Vestdalur Kr. 7.061.130,- styrkur til að bregðast við miklum skemmdum á náttúru í Vestdal. Vestdalur er skráður á náttúruminjaskrá og á Vestdalseyri hefur fornleifaskráningu verið lokið, en á svæðinu er mjög mikið að menningarminjum. Mikið er um hentugleikastíga, jarðvegsrof og uppstig eru varhugaverð. Innviða verkefni sem tengist náttúruvernd og öryggi. Ekki er um fulla styrkupphæð að ræða þar sem heimilt var að nýta hluta af styrk síðasta árs, enda verkefnin af svipuðum toga og þetta verkefni var næst á forgangslista heimamanna.
• Seyðisfjarðarkaupstaður – Göngustígar í Seyðisfirði: Gufufoss Kr. 3.400.000,- styrkur til að hanna göngu- og hjólstíg frá þéttbýli í Seyðisfirði upp að Gufufossi neðan við Múla. Mikil fjöldi fólks gengu að fossinum þegar skemmtiferðaskip eru í höfninni og nota þá þjóðveginn inn og út úr bænum sem göngustíg. Þessi fjöldi gesta telur í hundruðum samtímis og veldur mikilli slysahættu og álagi þar sem að akstur verður fyrir miklum töfum. Verkefnið snýst um hönnun mikilvægra innviða, sem miða að því að bæta öryggi og náttúruvernd á fjölsóttum ferðamannastað.

Í umsögn um verkefnin segir að þau stuðli að auknu öryggi og bættri umgengni á viðkæmum svæðum. Nánari upplýsingar um úthlutun Framkvæmdasjóðsins, verkefnaáætlun Landsáætlunar og fleira má finna í fréttatilkynningu á vef Ferðamálastofu hér.