Ferðamálastofa, Neytendastofa, Neytendasamtökin og Samgöngustofa stóðu í gær fyrir upplýsingafundi fyrir ferðaþjónustuna. Farið var yfir skyldur ferðaþjónustuaðila og rétt neytenda. Umræddar stofnanir hafa allar mikilvægu stjórnsýsluhlutverki að gegna á sviði ferðamála og samvinna þeirra á sviði upplýsingamiðlunar því afar mikilvæg. Fundinum var streymt á Facebook-síðu Ferðamálastofu og fór aðeins fram um hana en um 400 manns tóku þátt.

• Neytendastofa fjallaði um lög um pakkaferðir og samtengda ferðatilhögun nr. 95/2018 og í því ljósi rétt ferðamanna á grunni afbókana, áhrif ferða- eða samkomubanns stjórnvalda hér sem erlendis á réttarstöðu þeirra og áhrif aðgerða/breytingar ferðaskrifstofa á ferðatilhögun vegna kórónavírussins.
• Ferðamálastofa ræddi tryggingar vegna sölu pakkaferða og m.a.reglugerð ferðamálaráðherra,  sem heimilar Ferðamálastofu að taka tillit til aðstæðna tryggingaskyldra aðila vegna Covid-19 faraldursins og áhrifa hans á íslensk ferðaþjónustufyrirtæki við útreikning tryggingarfjárhæðar. 
• Neytendasamtökin reifuðu réttarstöðu neytenda á tímum kórónavírussins og hvernig samtökin koma til með að leggja sitt af mörkum til að styðja við neytendavernd næstu vikur og mánuði.
• Samgöngustofa fór yfir rétt flugfarþega m.a. þegar flugi er aflýst og í því ljósi reglugerð ESB nr. 261/2004 og Rg. 1048/2012 um skaðabætur og aðstoð til handa farþegum í flugi sem neitað er um far og þegar flugi er aflýst, seinkað eða flýtt eða vegna tapaðs farangurs eða tjóns á honum.
• Sjá má upptöku af fundinum hér.