Austurbrú hefur hleypt af stokkunum nýju hlaðvarpi þar sem fjallað verður um ýmis samfélagsmál í landshlutanum og verkefni stofnunarinnar. Þættirnir verða í umsjón starfsmanna Austurbrúar og verða innan tíðar aðgengilegir á helstu streymisveitum og vefsíðunum Austurland.is og Austurbrú.is. Enn sem komið er má nálgast þættina á Spotify eða hér neðar í fréttinni. 

Hlaðvarpið mun heita Austurland hlaðvarp og er helsti tilgangur þess að miðla áfram upplýsingum um starfsemi Austurbrúar. „Við viljum ræða um verkefnin okkar, samstarfsaðilana og önnur framfaramál hér í landshlutanum á mannamáli,“ segir Jón Knútur, einn umsjónarmanna hlaðvarpsins. „Viðfangsefni Austurbrúar eru mjög fjölbreytt og það er eðlilegt að efnisval og efnistök verði það líka. Við munum því fjalla um atvinnuþróun, menningu, menntun og ýmis önnur samfélagsmál í þessum þáttum.“

Hann segir að það hafi lengi staðið til að hefja hlaðvarpsútsendingar á vegum Austurbrúar en núna hafi rétta tækifærið komið. „Við höfum rætt það innanhús hvernig við miðlum upplýsingum í þessu ástandi sem nú ríkir og þá kviknaði þessi hugmynd að nýju. Hlaðvarpið er ótrúlega vinsæll miðill og þarna gefst tækifæri fyrir okkur að eiga samtal um verkefnin okkar og almennt um samfélagsþróun í landshlutanum.“

Kynning á Austurlandi hlaðvarpi

Stefnt er á að gera a.m.k. tvo þætti í mánuði til að byrja með og sá fyrsti fer í loftið í dag. Í honum fjalla þau Jóna Árný Þórðardóttir, María Hjálmarsdóttir og Jón Knútur Ásmundsson m.a. um áhrif kórónaveirufaraldursins á starfsemi Austurbrúar síðustu vikurnar og á atvinnulífið. Díana Mjöll Sveinsdóttir hjá Tanna Travel er sérstakur gestur en hún var í sóttkví þegar viðtalið var tekið og hafði verið í tæpar tvær vikur.

„Ástandið í samfélaginu setur mark sitt á þennan fyrsta þátt og væntanlega næstu þætti líka,“ segir Jón Knútur. „Við starfsmenn Austurbrúar höfum ekki hist í eigin persónu í nokkrar vikur og öll okkar samskipti fara fram í gegnum samskiptaforritið Teams og þar var þessi fyrsti þáttur okkar tekin upp líka.“

Fyrsti þáttur

Nánari upplýsingar veitir Jón Knútur Ásmundsson, verkefnastjóri hjá Austurbrú.
[email protected] // [email protected]