Gæði í upplýsingagjöf er rafrænt námskeið sem hentar þeim sem eiga í beinum samskiptum við ferðamenn á Austurlandi t.d. á gisti- og veitingastöðum, sundlaugum, verslunum og sjoppum. Það hentar nýliðum sérstaklega vel en getur líka eflt reyndara starfsfólk í starfi.

Það er afar þýðingarmikið fyrir ferðaþjónustu á Íslandi að framlínustarfsmenn séu meðvitaðir um mikilvægi sitt sem upplýsingagjafa. Tilgangur þessa námskeiðs er að auka gæðavitund í upplýsingagjöf til ferðamanna og nemendum verður kennt að bera virðingu fyrir vandaðri og traustri upplýsingagjöf. Námskeiðið er hægt að taka eitt og sér en er einnig mjög góð viðbót við námskeiðin Austurland og Móttaka gesta sem jafnframt er hægt að taka hjá Austurbrú. Öll þessi námskeið fengu styrk úr Fræðslusjóði. 

„Google geymir svör við mörgum spurningum en þegar á reynir geta samskipti við góðan mennskan upplýsingagjafa verið ómetanleg fyrir ferðamanninn, ekki síst í flóknum aðstæðum sem krefjast skjótra viðbragða,“ segir Jón Knútur Ásmundsson, verkefnastjóri og höfundur námskeiðsins.

Nemandinn getur tekið námskeiðið hvenær sem er, skoðað hvern kafla eins oft og hann þarf og hægt að taka hlé og byrja aftur síðar á sama stað. Í lok námskeiðsins er þekkingin prófuð og nemandi einnig beðinn að svara stuttu námskeiðsmati. 

Vegna stöðunnar í samfélaginu hefur Austurbrú ákveðið að bjóða frían aðgang að þessu námskeiði til 1. maí. 

Eftir það munu fyrirtæki og stofnanir sem eru í samstarfi við Austurbrú fá námskeiðið á sérstökum afsláttarkjörum. 

Námskeiðið verður fáanlegt á ensku innan tíðar.

• Skráning

Nánari upplýsingar

Jónína Brynjólfsdóttir, verkefnastjóri hjá Austurbrú
470 3807 // 899 5892 // [email protected]