Á dögunum lauk hópur frá Síldarvinnslunni námsleiðinni Líf og heilsa – lífsstílsþjálfun hjá Austurbrú. Markmið námsins er að efla heilbrigði, heilsutengda hugsun og hegðun. Fjallað er um andlegt heilbrigði, jafnvægi, hugarfar og leiðir til að draga úr langtíma streitu. Einnig er boðið upp á fræðslu og umræður um hollt mataræði og hreyfingu. Mikil áhersla var á persónulega markmiðasetningu þar sem hver og einn þátttakandi skoðaði eigin lífsstíl, líðan og áhugamál og setti sér markmið með tilliti til þess. Verkefnið, ásamt eftirfylgni, spannaði heilt ár.

Í apríl var áskorun lögð fyrir þátttakendur sem hreyfðu sig daglega og í maí var svo farið í göngu um Hólmanesið undir leiðsögn Guðrúnar Á. Jónsdóttur, líffræðings og yfirverkefnastjóra hjá Austurbrú. Almenn ánægja var með verkefnið meðal þátttakenda og stóð hópurinn sig gríðarlega vel.