Mikilvægt skref í uppbyggingu ferðaþjónustu á Austurlandi
„Þessi innspýting fjármuna frá Framkvæmdasjóði ferðamála er okkur gríðarlega mikilvæg,“ segir Ásdís Helga Bjarnadóttir hjá Austurbrú en hún stýrir verkefninu Fögur framtíð í Fljótsdal sem hefur það að markmiði að efla og styrkja samfélagið í Fljótsdal.
Glæsileg verkefni á Austurlandi fá úthlutað
Það er alltaf spennandi þegar hulunni er svipt af úthlutun fjármuna frá Framkvæmdasjóði ferðamannastaða og Landsáætlun. Nokkur glæsileg verkefni á Austurlandi fengu brautargengi sem munu án nokkurs vafa efla og styrkja landshlutann. Hlutur Fljótsdals er sérlega glæsilegur en þjónustuhús við Hengifoss fær næsthæstu upphæðina á landsvísu eða 55 milljónir króna.
Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, og Guðmundur Ingi Guðbrandsson, umhverfis- og auðlindaráðherra, gerðu í gær grein fyrir úthlutun fjármuna til uppbyggingu innviða, náttúruverndar og annarra verkefna á ferðamannastöðum árið 2021.
Tæpar 150 milljónir í austfirska ferðamannastaði
Tæplega 150 milljónir var veitt til austfirskra verkefna úr Framkvæmdasjóði ferðamannastaða. Þjónustuhús við Hengifoss fær næsthæstu upphæðina á landsvísu eða 55 milljónir króna. Ætlunin er að reisa þjónustuhús þar sem veittar verða upplýsingar, landvörslu sinnt auk salernisaðstöðu. Alls fær Fljótsdalshreppur tæpar 65 milljónir til framkvæmda á Hengifosssvæðinu en að auki eru veittir styrkir í smíði göngubrúa, bættar merkingar og uppbygging aðstöðu fyrir sorpflokkun og nestisaðstöðu við bílaplan. Þá fékk verkefni sem lýtur að því að bæta stíga og merkingar á gönguleiðinni upp að Strútsfossi styrk upp á 1,6 milljónum króna.
Mikil þörf
„Þessi innspýting fjármuna frá Framkvæmdasjóði ferðamála er okkur gríðarlega mikilvæg,“ segir Ásdís Helga Bjarnadóttir hjá Austurbrú en hún stýrir verkefninu Fögur framtíð í Fljótsdal sem hefur það að markmiði að efla og styrkja samfélagið í Fljótsdal. „Hengifoss í Fljótsdal er áfangastaður á Austurlandi sem dregur fjölda ferðamanna til sín og Fljótsdælingar eru afar stoltir af. Framkvæmdasjóðurinn hefur lagt uppbyggingunni þar lið með framlagi en ágangurinn hefur sífellt verið að aukast sem kallar á meiri dreifingu fólks um svæðið og ekki síst þörf fyrir meiri landvörslu yfir háannatímann,“ segir hún ennfremur.
Bretta þarf upp ermar
Ásdís segir að unnið sé eftir deiliskipulagi og að hönnunartillaga að þjónustuhúsi hafi lengi legið fyrir en að ekki hafi verið hægt að fylgja verkefninu eftir sökum fjárskorts. „Nú þurfum við bara að fara að bretta upp ermarnar og huga að því hvort áhugasamir samstarfsaðilar vilji koma inn í þetta með okkur til að gera umgjörðina og þessa gátt inn í Fljótsdal enn eftirminnilegri,“ segir hún og bætir við að Fljótsdælingar séu jafnframt í skýjunum yfir því að ábúandinn við Strútsfoss hafi fengið fjármagn til að merkja gönguleið og bæta áningarstaðinn.
Velgengni austfirskra verkefna
Fleiri austfirsk verkefni hlutu brautargengi hjá Framkvæmdasjóðnum að þessu sinni. Alls er 25 milljónum veitt til tveggja verkefna við Stuðlagil. Landeigandi Klaustursels fær styrk til að gera deiliskipulag fyrir aðkomusvæðið að gilinu í landi hans og Múlaþing fær samanlagt tæpar 36 milljónir í þrjú verkefni.
Nánari upplýsingar um úthlutun sjóðsins er finna í fréttatilkynningu ráðuneytisins en alls var ríflega 800 milljónum króna veitt til 54 verkefna um land allt.
Rúmar 100 milljónir austur úr landsáætlun
Þá var um 105 milljónum króna úthlutað austur úr Landsáætlun um uppbyggingu innviða til ferðaþjónustu. Um þriðjungur fjárins fara í framkvæmdir á Teigarhorni í Berufirði,
Skógræktin fær 23 milljónir í fyrsta áfanga eldaskála á Hallormsstað. Tæpar 20 milljónir fara í framkvæmdir á Galtastöðum fram í Hróarstungu, 19 milljónir króna koma í hlut Umhverfisstofnunar til framkvæmda við Helgustaðanámu en þar á að gera þjónustuhús, endurbæta göngustíg og bæta merkingar. Þá er úthlutað tæpum 12 milljónum til Vatnajökulsþjóðgarðar í merkingar á Snæfellsöræfum og í Krepputungu, í deiliskipulag við Kreppugungu og í nýja göngubrú yfir ána Volgu við Kverkfjöll.
Alls var 764 milljónum króna úthlutað úr Landsáætluninni.
Nánari upplýsingar
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
