Próf eru þreytt hjá Austurbrú allan ársins hring en nú er fram undan önnur stærsta törn ársins.

Mesti þunginn í próftökum verður frá komandi mánudegi til 16. desember. Áætlað er að lögð verði fyrir 330 próf á öllum sjö starfsstöðvum Austurbrúar á þeim tíma. Flest prófin eru á vegum Háskólans á Akureyri en næstflest frá Háskóla Íslands. Próf frá öllum háskólum landsins eru þreytt hjá Austurbrú, að Listaháskóla Íslands undanskildum, auk prófa frá Keili, nokkrum framhaldsskólum og öðrum fræðslustofnunum.

Flestir sem taka próf hjá Austurbrú stunda fjarnám en einnig nýtir ákveðinn hópur austfirskra nemenda tækifærið, fer snemma austur eftir að kennslu lýkur og dvelur hjá ættingjum við próflesturinn. Hjá Austurbrú geta fjarnemar sótt fjölbreytta þjónustu, allt eftir því hvað hentar kennsluaðferðunum og hverjum og einum nemanda: lesaðstöðu, nettengingu, leiðbeiningar varðandi nám, s.s. námstækni, skipulag verkefna og ráðgjöf vegna prófkvíða.