Ársfundur Austurbrúar var haldin á Breiðdalsvík í gær. Árið 2017 var bæði viðburða- og árangursríkt en ársreikningur sýnir að í fyrsta sinn frá stofnun 2012 er Austurbrú með jákvætt eigið fé. Framkvæmdastjóri Austurbrúar þakkar þennan árangur m.a. sterkri kostnaðarvitund starfsfólks og góðri samvinnu starfsmanna og stjórnar stofnunarinnar.

Árið 2017 var árangursríkt í rekstri Austurbrúar. Rekstrartekjur Austurbrúar jukust á milli ára og voru 356,5 m.kr. samanborið við 321,8 m.kr. á árinu 2016. Tekjuaukningu milli ára má fyrst og fremst rekja til aukinna umsvifa á sviði símenntunar sem og ýmis konar verkefna á sviði atvinnu- og markaðsmála.

Kostnaður jókst samhliða aukningu tekna en laun og launatengd gjöld voru undir áætlun. Rekstrarniðurstaða var því jákvæð sem nemur 36,1 m.kr. á árinu 2017 samanborið við 32,4 m.kr. árið áður. Eigið fé stofnunarinnar í árslok 2017 var jákvætt sem nemur 2,4 m.kr. samanborið við neikvætt eigið fé sem nam 33,7 m.kr. í árslok 2016. Eigið fé stofnunarinnar hefur því styrkst sem nemur 87,4 m.kr. frá árinu 2014. Veltufé frá rekstri jókst á milli ára og var 39,1 m.kr. á árinu 2016 samanborið við 38,0 m.kr. árið á undan.

Á árinu 2017 var haldið áfram að greiða niður langtímalán sem tekið var snemma árs 2015 til endurskipulagningar á sjóðstreymi stofnunarinnar. Með útsjónarsemi, sterkri kostnaðarvitund og góðri samvinnu starfsmanna og stjórnar Austurbrúar hefur þessi tímamótaárangur í rekstri stofnunarinnar náðst fyrr en áætlanir gerðu ráð fyrir.

Eykur traust

Jóna Árný Þórðardóttir, framkvæmdastjóri Austurbrúar, segir þýðingu þessa árangurs mikinn bæði til lengri og skemmri tíma: „Á árinu 2014 var fjárhagsleg staða Austurbrúar orðin mjög þröng, vægast sagt,“ segir hún. „Það var ljóst að mjög breiða samvinnu þyrfti til svo snúa mætti við rekstrinum. Við gerðum ráð fyrir að ná þessum tímamótum um jákvætt eigið fé um mitt ár 2019 og erum því einu og hálfu ári á undan áætlun sem er mjög ánægjulegt. Til skemmri tíma þýðir þetta að við getum staðið við okkar skuldbindingar. Endurskoðandi stofnunarinnar setur ekki lengur fyrirvara við rekstrarhæfi stofnunarinnar í ársreikninginn sem er afar ánægjulegt. Til lengri tíma má líta á þetta sem áfanga í þeirri vinnu að byggja upp nægjanlega sterkt eigið fé til að mæta eðlilegum rekstrarsveiflum. Við erum ekki alveg komin þangað en erum á góðri leið.“

Jóna Árný segir þó mestu máli skipta að þetta auki traust á Austurbrú. „Starfsfólk okkar hefur sýnt að þau leggja sig fram í hverju því sem þau taka sér fyrir hendur og finnst mér aðdáunarvert hvað við höfum getað sinnt áhugaverðum og metnaðarfullum verkefnum þrátt fyrir fjárhagslega endurskipulagningu,“ segir hún. 

Menntunin í aðalhlutverki

Eins og fyrr segir var ársfundurinn haldinn á Breiðdalsvík í gær og í beinu framhaldi var haldið málþing um menntun og fjórðu iðnbyltinguna. Hvers vegna varð þetta efni fyrir valinu?

Jóna Árný svarar því til að menntun skipti Austurbrú miklu máli. „Það má segja að menntun sé um helmingur af starfsemi stofnunarinnar,“ segir hún. „Við ræddum þetta innandyra og starfsfólki fannst þetta vera mikilvægt umræðuefni til að ræða nú. Breytingarnar eru gríðarlega hraðar í umhverfinu okkar og munu hafa mikil áhrif á næstu árum, ekki bara á menntun, heldur á samfélagið allt. Sem samfélag þurfum við að undirbúa okkur undir þessar breytingar og þar er menntunin í lykilhlutverki. Við þurfum að undirbúa börnin okkar undir framtíð sem krefst annarrar færni og hæfni en við töldum nauðsynlega fyrir 20 árum síðan. Þetta á við hér fyrir austan líka og við þurfum að passa að við nýtum tækifærin sem þessi þróun hefur í för með sér. Við viljum ekki að austfirskt samfélag sitji uppi eingöngu með neikvæðu afleiðingarnar af fjórðu iðnbyltingunni.“

Meðal fyrirlesara á málþinginu eru Ragnheiður H. Magnúsdóttir, þróunarstjóri hjá Marel, Þóroddur Bjarnason, prófessor við Háskólann á Akureyri, Yngvi Björnsson, prófessor við Háskólann í Reykjavík, og fleiri en sjá má dagskrána hér.

Sjá ársreikning 2017. 

Sjá ársskýrslu 2017. 

Nánari upplýsingar veitir Jóna Árný Þórðardóttir.