Upphaflega birtist þessi umfjöllun á frétta- og mannlífssíðunni Austurfrétt. Sjá hér.

„Við ákváðum strax að við vildum ekki gera þetta týpíska póstkort með náttúrumyndum, fjöllum eða norðurljósum, heldur vildum við reyna að vekja athygli á sérstöðu okkar og gera það á skoplegan hátt. Hreindýrið er að sjálfsögðu okkar sérstaða svo við ákváðum að hafa það í forgrunni,“ segir María Hjálmarsdóttir, verkefnastjóri hjá Austurbrú um póstkort sem Austurbrú lét hanna fyrir Mid-Atlantic ferðasýninguna sem fram fór fyrr í þessu mánuði. 

Mid-Atlantic ferðasýninging fór fram í Laugardagshöllinni þann 5. til 7. febrúar síðastliðinn. Sýningin er haldin árlega í Reykjavík og er á vegum Icelandair. Þarna koma saman þeir helstu sem starfa í ferðamannaiðnaðinum; bæði íslenskir og erlendir ferðaþjónustuaðilar, flugfélög og þær ferðaþjónustur sem eru að koma Íslandi á framfæri. Í ár vakti austfirsk hönnun og austfirskur húmor mikla athygli.

„Markaðsstofa Austurlands tekur alltaf þátt í sýningunni og oftast höfum við boðið sýningargestum upp á nammi, penna eða USB lykla en í ár ákváðum að fara í þennan gamla stíl að dreifa póstkorti,“ segir María Hjálmarsdóttir, verkefnastjóri hjá Austurbrú, í umfjöllun Austurfréttar. 

Skemmtilega öðruvísi

„Við ákváðum strax að við vildum ekki gera þetta týpíska póstkort með náttúrumyndum, fjöllum eða norðurljósum heldur vildum við reyna að vekja athygli á sérstöðu okkar og gera það á skoplegan hátt. Hreindýrið er að sjálfsögðu okkar sérstaða svo við ákváðum að hafa það í forgrunni.

Við vorum öll mjög sátt við þessa ákvörðun og okkur fannst þetta skemmtileg pæling enda eru eiginlega allir með náttúrumyndir og oft er mjög erfitt að greina hvaða mynd er hvaðan. Austurland er auðvitað þekkt fyrir fallega náttúru og 80% af ferðamönnum koma til Íslands út af þessari fegurð um allt land, en nú vildum við vekja athygli á okkur á annan hátt,“ segir hún.

Bleikur, rauður eða engin

Það var María sem átti hugmyndina sem hún síðan vann og útfærði með grafískum hönnuðum. „Þegar við tökum þátt í þessari sýningu erum við alltaf með svona heildarútlit fyrir allt Austurland. Ákveðið þema sem öll fyrirtæki héðan nota. Þemað okkar núna var veggur með rauðum panil neðst og veggfóðri með myndum sem hvert fyrirtæki gat svo skreytt með sínu nefi og sínu lógói. Við ákváðum að gera kortið í sama stíl. Ég vildi bara fá hreindýr í líki konu og mjög lítinn texta. Það voru svo hönnuðir héðan að austan sem unnu þetta með mér og var það mjög skemmtilegt samstarf. Þetta sló í gegn á sýningunni. Fólki fannst þetta smart nálgun og flott pæling,“ sagði María að lokum í viðtalinu við Austurfrétt.

Þessa má geta að það var Grafít á Djúpavogi sem hannaði póstkortið.