Í vor fóru tveir starfsmenn Austurbrúar til Svíþjóðar til að hitta samstarfsfólk í verkefninu TOURISM DEVELOPMENT CHALLENGES IN NORDIC AND BALTIC COUNTRIES sem hefur verið sagt frá áður á þessari síðu.  

Austurbrú hóf í fyrra þátttöku í verkefni sem snýr að því að mynda tengslanet fullorðinsfræðsluaðila og lítilla stofnana sem vinna að ferðamálum á strjálbýlum svæðum á Norðurlöndum og Eystrasaltslöndunum. Í fyrrahaust fóru þær til Klaipéda í Litháen sem var eins konar „kick off“ fundur fyrir verkefnið. Að þessu sinni var farið til Lillhärdal í Svíþjóð.

„Við ræddum um fyrirtæki sem  við skilgreinum sem fyrirmyndarfyrirtæki/verkefni í ferðaþjónustu,“ segir Hulda Guðnadóttir sem tekur þátt í verkefninu fyrir hönd Austurbrúar auk Sigrúnar Víglundsdóttur um fundinn í Svíþjóð. Slík fyrirtæki eru sjálfbær og rekin allt árið með góðum árangri. Við tókum út svæðin okkar með SVOT-greiningu og bárum þau saman við hin löndin í verkefninu til þess að sjá hvað við eigum sameiginlegt og hvað er frábrugðið. Svo fórum við yfir fjárhagsáætlun verkefnisins, gerðum greiningar á verkefninu og skipulögðum næsta hitting sem verður hjá okkur á Austurlandi í sumar.“