Þjóðarspegillinn fór fram í Háskóla Íslands föstudaginn 28. október sl. í sautjánda skipti. Þar eru kynntar áhugaverðar og nýlegar rannsóknir í félagsvísindum. Í ár voru kynntar tvær rannsóknir sem Austurbrú hefur haldið utan um.

Haldnir voru 150 fyrirlestrar í 45 málstofum og kynnti Austurbrú erindi í málstofu sem bar heitið Jaðarbyggðir og brottfluttir.

Annars vegar var kynnt rannsóknin Eyjahjartað sem fjallar um áhrif og framlag brottfluttra til fyrrum heimahaga sinna í gegnum hátíðir og viðburði á heimaslóðum. Niðurstöður þeirrar rannsóknar, sem framkvæmd var í fjórum löndum, benda til þess að brottfluttir séu auðlind og í gegnum sterk tengsl og væntumþykju til heimahaganna séu tilbúnir að leggja ýmislegt af mörkum þar án þess endilega að flytja heim.

Hins vegar var haldið erindi sem bar yfirskriftina Ég kem ekki aftur og greinir þar frá niðurstöðum rannsóknar meðal brottfluttra kvenna af Austurlandi. Hringt var í 108 brottfluttar konur og þær spurðar um ástæður flutninga og hvort líklegt sé að þær flytji aftur austur. Þar var megin niðurstaðan sú að aðeins um 3% brottfluttra kvenna hyggjast snúa aftur til Austurlands. Í rannsókninni kom líka fram að tengsl við svæðið hafa mikið að segja um líkur á því að konurnar snúi til baka.

Innan Austurbrúar er áhersla á að sinna svæðisbundnum rannsóknum sem styðja við og eru innlegg í stefnumótun og byggðaþróun. Bæði er um að ræða litlar kannanir sem snúa að minni einingum s.s. fyrirtækjum og stærri rannsóknir sem taka fyrir stærri svið s.s. sveitarfélög eða samstarfsrannsóknir eins og Eyjahjartað.