Austurbrú fellur ekki inn í hefðbundnar skilgreiningar á stofnunum og hlutverkum þeirra. Markmið hennar er, eins og nafnið gefur til kynna, að brúa byggðir, starfsgreinar og þjónustu á Austurlandi.  Við trúum því að saman náum við betri árangri.

Með augun á framtíðinni

Austurbrú varð til með samruna Þekkingarnets Austurlands, Þróunarfélags Austurlands, Menningarráðs Austurlands, Markaðsstofu Austurlands og skrifstofu Sambands sveitarfélaga á Austurlandi. Hún á sér fjölmarga guðforeldra en að henni standa yfir þrjátíu stofnaðilar, þar á meðal öll sveitarfélögin á Austurlandi, allir háskólar landsins, helstu fagstofnanir, stéttarfélög og hagsmunasamtök atvinnulífsins, framhaldsskólar og þekkingarsetur á Austurlandi. Það er ekkert smáræðis veganesti!

Afmælisbarnið glímdi við ýmsar áskoranir á fyrstu árunum enda voru þeir sem komu að stofnun hennar ekki með neina fyrirmynd. Austurbrú átti sér einfaldlega enga hliðstæðu á Íslandi. Og kannski þess vegna voru fleiri fréttir sagðar af vanda hennar en þeim góðu verkum sem alla tíð hafa verið unnin innan hennar.

Með þrautseigju stjórnenda og starfsfólks og góðum stuðningi frá baklandinu hefur gengið vel að reka Austurbrú á seinni árum og bera fjölmörg verkefni þess vitni að innan hennar er horft til framtíðar. Nýjasta dæmið er tillaga að Svæðisskipulagi Austurlands 2022 til 2044 sem að vonum verður staðfest komandi haust. Þar ber að líta heildarframtíðarsýn fyrir Austurland, þróuð og mótuð af lýðræðislega kjörnum fulltrúum landshlutans og verkefnastýrt af Austurbrú, þar sem eitt meginstefið er einmitt aukin samvinna á Austurlandi.

Það mætti tína til fjölmörg önnur dæmi um framsækin verkefni sem unnin eru innan Austurbrúar á sviði menningar, atvinnuþróunar, markaðssetningar, fræðslu og rannsókna þar sem tilgangurinn er ávallt sá að bæta lífið á Austurlandi fyrir okkur sem búum hérna, afkomendur og gesti.

Viljinn til samvinnu

Að umfangi hefur Austurbrú ekki tekið miklum breytingum með sínar sjö starfstöðvar og á þriðja tug starfsmanna en starfið hefur vissulega breyst í takt við tímann. Það sem hefur þó ekki tekið neinum breytingum er stefnan og vilji starfsfólks til að leiða fólk saman til góðra verka.

Tíu ára afmælisbarnið Austurbrú er ólíkt jafnöldrum sínum að því leyti að það hefur slitið barnskónum. En líkt og þeir, á Austurbrú sér bjarta framtíð með spennandi tækifærum og möguleikum á að láta gott af sér leiða, og við sjáum á sjóndeildarhringnum áframhaldandi kröftugt starf Austurbrúar færa Austfirðingum öllum bættan hag.

Við óskum Austurbrú til hamingju með áfangann!