Fjárhagslegri endurreisn Austurbrúar miðaði betur á árinu 2016 en áætlanir gerðu ráð fyrir og er nú hagnaður af rekstri stofnunarinnar annað árið í röð. Þetta kom fram ársfundi Austurbrúar sem haldinn var í Végarði, Fljótsdal í gær.

Í árslok 2015 var samþykkt fjárhagsáætlun fyrir árið 2016 sem gerði ráð fyrir rekstrarafgangi upp á 7,6 milljónir króna. Rekstrartekjur Austurbrúar voru 321,8 milljónir kr. á árinu 2016 og nam hagnaður af rekstri 32,4 milljónum kr. samanborið við 19,1 milljónir króna árið á undan. Neikvætt eigið fé stofnunarinnar var 33,7 milljónir kr. í árslok 2016 og hefur það styrkst sem nemur 51,3 milljónir króna frá árinu 2014. Veltufé frá rekstri jókst á milli ára og var 38 milljónir kr. á árinu 2016 samanborið við 23,4 milljónir kr. árið á undan. Á árinu 2016 var greidd fyrsta afborgunin af langtímaláni sem tekið var til endurskipulagningar á sjóðstreymi stofnunarinnar snemma á árinu 2015.

Í ávarpi sínu sagði Jóna Árný Þórðardóttir, framkvæmdastjóri Austurbrúar, að ljóst væri að árangur í rekstri Austurbrúar byggði á samvinnu fjölda aðila. Nefna mætti samspil kostnaðarvitundar og útsjónarsemi starfsmanna stofnunarinnar, sterkrar framtíðarsýnar og öflugrar stjórnar. Þá hefði gott og skilvirkt innra skipulag hjá Austurbrú ennfremur stuðlað að bættum rekstri.

Ný stjórn var kjörin á fundinum og í henni sitja nú:

Af vettvangi sveitastjórnarmála:

Jón Björn Hákonarson (formaður)

Sigrún Blöndal

Gauti Jóhannesson

Arnbjörg Sveinsdóttir (varamaður)

Af vettvangi atvinnulífs, menntunar og menningar:

Sveinn Jónsson

Sæunn Stefánsdóttir

Adolf Guðmundsson (varamaður)   

Sjá ársskýrslu.

Sjá ársreikning.

Frekari upplýsingar veitir Jóna Árný Þórðardóttir, framkvæmdastjóri Austurbrúar.