Haldin verður barna- og ungmenna menningarhátíð í fyrsta skipti á Austurlandi. Hátíðin hefur fengið nafnið BRAS og mun að miklu leyti fara fram í menningarmiðstöðvunum á Austurlandi í september. Einkunnarorð hátíðarinnar er þora, vera, gera og er lögð sérstök áhersla að leyfa börnum að vera þátttakendur í smiðjum ásamt því að njóta listviðburða.

Opnunarhátíð þar sem öllum börnum á Austurlandi verður boðið, verður haldin á þrem stöðum á Austurlandi laugardaginn 8. september. Nánari auglýsingar verða í fjölmiðlum á Austurlandi auk þess sem heimasíðan https://www.bras.is opnar á næstu dögum.

Í þeim þjóðfélagsbreytingum sem nú eiga sér stað með fjórðu iðnbyltingunni er mjög mikilvægt að börn læri skapandi hugsun og kynnist listum og menningu út frá sem víðustu sjónarhorni. BRAS á vonandi eftir að auka möguleika barna til listsköpunar og uppgötvunar á eigin listrænum hæfileikum og til þess auka getu barna og ungmenna til að takast á við breytingar á vinnumarkaði.

Samband sveitarfélaga á Austurlandi ákvað að leggja fjármagn í barnamenningarhátíð í gegnum fjármagn frá Sóknaráætlun Austurlands. Austurbrú hefur umsjón með verkefninu í samstarfi við Skólaskrifstofu Austurlands og menningarmiðstöðvarnar á Austurlandi; Skaftfell, Menningarmiðstöð Fljótsdalshéraðs/Sláturhúsið, Menningarstofa Fjarðabyggðar og Tónlistamiðstöð Austurlands. Sveitarfélögin Fjarðabyggð og Fljótsdalshérað hafa unnið menningarstefnu þar sem mikil áhersla er á eflingu menningar fyrir börn og ungmenni. Þessi sveitarfélög verða með listasmiðjur fyrir skóla og viðburði á hátíðinni og hafa lagt til bæði vinnu og fjármagn í BRAS.

Mikil áhersla hefur verið á auka listir og menningu fyrir börn síðustu ár. Í kjölfar menningarstefnu ríkisins hefur m.a. orðið til verkefnið List fyrir alla. Barnamenningarhátíð er haldin árlega í Reykjavík með miklum ágætum og fleiri sveitarfélög hafa fylgt í kjölfarið. BRAS er fyrsta barnamenningarhátíð sem haldin verður í heilum landshluta og vonast skipuleggjendur til að þátttaka verði góð og hátíðin sé komin til að vera og vaxi á næstu árum, bæði með þátttöku fleiri stofnanna sem og almennings.

Nánari upplýsingar gefur Signý Ormarsdóttir verkefnastjóri hjá Austurbrú í síma 470 3800.