Framhaldsársfundur Austurbrúar ses. var haldinn á Hótel Héraði á Egilsstöðum í gær. Á fundinum voru samþykktar breytingar á skipulagsskrá stofnunarinnar sem eru til þess fallnar að einfalda skipulag hennar þannig að til verði ein heildstæð stofnun sem getur betur sinnt hlutverki sínu sem helsta stoðstofnun Austurlands.

Ákveðið var á ársfundi Austurbrúar ses. síðastliðið vor að fresta afgreiðslu á málum sem vörðuðu breytingar á skipulagsskrá og innri reglum stofnunarinnar sem og kjöri nýrrar stjórnar. Þessi mál voru tekin til umræðu á framhaldsársfundinum og er skemmst frá því að segja að allar breytingartillögur, sem starfsháttanefnd Austurbrúar lagði til að gerðar yrðu á skipulagsskrá, voru samþykktar. Tillögurnar miða að því að skýra betur skil á milli Austurbrúar og Sambands sveitarfélaga á Austurlandi, þær eiga að einfalda stjórnskipulag Austurbrúar í skipulagsskrá og jafnframt einfalda innra skipulag Austurbrúar í skipuriti. Markmiðið með þessum breytingum er m.a. að draga úr gömlu málaflokkaskiptingunni sem fylgdi inni í Austurbrú með fyrri stofnunum. 

Þá staðfesti fundurinn breytingar á innri reglum Austurbrúar ses. en starfsháttanefnd leggur til að gerðar verði umtalsverðar breytingar á innra skipulagi til að auka sveigjanleika hvetja til þverfaglegrar samvinnu sem lagt var upp með að yrði einn af helstu kostum sameinaðrar stoðstofnunar. Breytingarnar miða einnig að því að leysa vandamál sem komið hafa upp í starfseminni og skýra og auka ábyrgð starfsmanna.

Kjörin var ný stjórn á fundinum. Í henni sitja Adolf Guðmundsson (varamaður), Berglind Häsler, Jón Björn Hákonarson (formaður), Karl Lauritzson, Páll Baldursson (varamaður), Sigrún Birna Björnsdóttur, Sveinn Jónsson, Sæunn Stefánsdóttir og Þórunn Egilsdóttir. Skipan nýrrar starfsháttarnefndar var jafnframt staðfest. Í henni sitja sem fyrr: Björn Hafþór Guðmundsson, Guðrún Á. Jónsdóttir og Skúli Björn Gunnarsson (formaður). Siðanefnd var einnig kjörin og í henni sitja: Eva Dís Pálmadóttir, Gunnlaugur Sverrisson og Vilhjálmur Jónsson.

Eftir fundinn gekk ný stjórn frá ráðningu Jónu Árnýjar Þórðardóttur í starf framkvæmdastjóra til áramóta en hún hefur gengt starfinu frá því í byrjun maí.

Fundargerð má sjá hér.

Texti við mynd: Ný stjórn Austurbrúar: Efri röð f.v.: Sveinn Jónsson, Þórunn Egilsdóttir, Jón Björn Hákonarson, Karl Lauritzson. Neðri röð f.v.: Páll Baldursson (varamaður), Sæunn Stefánsdóttir og Berglind Häsler. Á myndina vantar Sigrúnu Birnu Björnsdóttur og Adolf Guðmundsson.

Nánari upplýsingar veitir Jóna Árný Þórðardóttir í síma 869 9373.