Yfir hundrað manns hafa skráð sig á ráðstefnuna „Sókn landsbyggða: Kemur unga fólkið? Hvar liggja tækifærin?“ sem haldin verður á Breiðdalsvík og hefst á morgun og stendur fram á fimmtudag. Á ráðstefnunni stendur m.a. til að kynna nýjar rannsóknir í byggðamálum m.a. verður sagt frá nýrri rannsókn um ástæður brottflutnings kvenna.

Fjölmörg áhugaverð erindi verða flutt þar sem nýjar rannsóknir verða í brennidepli. Kynntar verða nýlegar rannsóknir á þróun menntamála, atvinnuhátta sjávarbyggða, ferðaþjónustu, stóriðju og síðast en ekki síst á viðhorfum ungs fólks og brottfluttra kvenna en rannsókn á því síðastnefnda unnu Tinna Kristbjörg Halldórsdóttir og Birna Guðrún Árnadóttir fyrir Austurbrú.

„Á flestum jaðarsvæðum er samsetning mannfjöldans sú að konur eru færri en karlar og þá sérstaklega ungar konur á aldrinum 20-40 ára,“ segir Tinna Kr. Halldórsdóttir, verkefnastjóri hjá Austurbrú. „Á Austurlandi er staðan svipuð og fleiri ungar konur flytja brott varanlega en ungir menn. Gerð var viðtalsrannsókn vorið 2016 þar sem rætt var við 108 konur á aldrinum 21-40 ára af flestum svæðum á Austurlandi. Spurt var um ástæður brottflutnings, styrk tengsla við svæðið sem flutt var frá, mat á ýmsum innviðum og líkurnar á að snúa aftur til búsetu á Austurlandi.“

Niðurstöðurnar voru þær að flestar fluttu vegna náms eða persónulegra ástæðna. Atvinnumöguleikar á Austurlandi voru almennt taldir fáir fyrir konur og mátu konurnar svo að þeirra eigin möguleikar væru færri en fyrir konur almennt en fyrir karla væru næg atvinnutækifæri. Innan við 3% svarenda sáu fyrir sér miklar líkur á að flytja til baka á Austurland og alls um 20% sem töldu nokkrar líkur. Þær sem helst álitu það möguleika voru í meirihluta háskólamenntaðar konur sem voru fæddar og uppaldar á Austurlandi. Tengsl við þann stað sem flutt var frá höfðu mikið forspárgildi varðandi líkur á að snúa til baka og er sú niðurstaða í samhljómi við aðrar rannsóknir sem gerðar hafa verið meðal brottfluttra frá jaðarsvæðum.

Um þessa rannsókn og fleiri verður rætt um á málþinginu á Breiðdalsvík sem hefst á morgun.

Nánari upplýsingar og dagskrá má finna hér.