Dagar myrkurs er byggðahátíð Austurlands þar sem gervallur fjórðungurinn leggst á eitt til að gera íbúum og gestum þeirra glaða daga í svartasta skammdeginu og lýsa það upp – ellegar undirstrika það með skírskotun í ríkan drauga- og vættaarf. Í fimm daga rekur svo hver viðburðurinn annan í hverju bæjarfélagi og ættu háir sem lágir að finna eitthvað við sitt hæfi í dagskránni. Listafólk leggur lóð sín á vogarskálarnar; tónlist og myndlist verða í öndvegi, hlaðborð og þjóðlegir réttir, kertaljós og kósý-stundir í sundlaugum, ljóðalestur, draugagangur og afturganga, bílabíó og Ástardagar, sviðamessa, myrkra- og grímuböll, og stjörnum og norðurljósum fagnað svo eitthvað sé nefnt. Verslanir og þjónustuaðilar bjóða freistandi tilboð á vörum, veitingum og gistingu í tilefni daganna.

Hér má sjá glæsilega dagskrá, en ítarlegri lýsingar á viðburðum má finna á heimasíðum sveitarfélaganna og á Facebook og Instagram. Við bjóðum alla gesti hjartanlega velkomna og hlökkum til að njóta samveru hvers annars í myrkrinu. 

DAGSKRÁ DAGA MYRKURS
Djúpivogur
Breiðdalsvík
Stöðvarfjörður
Fáskrúðsfjörður
Reyðarfjörður
Eskifjörður
Norðfjörður
Fljótsdalshérað
Borgarfjörður eystri
Vopnafjörður
Seyðisfjörður

LJÓSMYNDASAMKEPPNI 
Á meðan Dagar myrkurs standa yfir verður ljósmyndasamkeppni um þemað „Manneskjan í myrkrinu“. Myndum skal skila inn á netfangið [email protected] eða með #dagarmyrkurs á Instagram. Tekið verður við myndum til og með 3. nóvember 2019. Verðlaun fyrir fyrsta sætið eru 50.000 kr. 

Austurbrú áskilur sér rétt til að nota myndir sem sendar eru í keppnina til kynningar á Dögum myrkurs. 

Meðfylgjandi mynd: Sigurmynd ljósmyndasamkeppninnar Drungi, sem fram fór á Djúpavogi á Dögum myrkurs í fyrra, átti Unnur Malmquist Jónsdóttir.