Pólskur frumkvöðull
„Það var ekkert fyrir ferðamennina að gera í vatni og ég spurði bara sjálfan mig: „Af hverju ekki að bjóða upp kayakferðir?“ segir Maciej Pietruńko frá Póllandi sem hefur lært íslensku hjá Austurbrú og notið þjónustu Uppbyggingarsjóðs Austurlands.
„Ég elska að sjá fólk brosa“
Íslenskukennsla fyrir útlendinga er metnaðarmál hjá Austurbrú og frá byrjun hefur verið lögð mikil áhersla á að bjóða upp á slíka kennslu um allt Austurland. Hjá okkur hafa hundruðir nemenda frá öðrum löndum stundað nám og er Maciej Pietruńko frá Póllandi einn þeirra.
Maciej kom til landsins árið 2017 og byrjaði fljótlega að læra íslensku hjá Austurbrú. Hann hefur nú lokið fjórða námskeiðinu sínu og það leynir sér ekki. Tök hans á íslensku eru orðin mjög góð. Nýlega stofnaði hann ferðaþjónustufyrirtækið Artic Fun og hefur í nógu að snúast þessa dagana við undirbúning ferðasumarsins. „Það var ekkert fyrir ferðamennina að gera í vatni og ég spurði bara sjálfan mig: „Af hverju ekki að bjóða upp kayakferðir?“ segir Maciej.
Greip tækifærið
„Ég kom upphaflega til Íslands vegna þess að vinur minn sagði mér að það vantaði starfsmenn í Löngubúð á Djúpavogi. Ég greip bara tækifærið og dreif mig á staðinn!“ segir hann.
Maciej segir það hafa skipt sköpum að læra íslensku. „Það brosa allir þegar ég tala íslensku og ég elska að sjá fólk brosa!“ segir hann og bætir við: „Mér gekk líka betur að stofna fyrirtækið mitt því það hjálpar mikið að skilja t.d. hvað endurskoðandinn er að segja.“ Maciej hefur ekki eingöngu sótt námskeið hjá Austurbrú heldur hefur hann einnig notið aðstoðar og ráðgjafar hjá Uppbyggingarsjóði Austurlands sem Austurbrú hefur umsjón með. „Stuðningur sjóðsins hefur hjálpað mér mikið við að hefja reksturinn,“ segir hann.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
