Á Vopnafirði er byrjað fagnámskeið fyrir starfsmenn í heilbrigðis- og félagsþjónustu. Að námskeiðinu standa Austurbrú, dvalaheimilið Sundabúð og Vopnafjarðarhreppur. Á námskeiðinu eru tólf konur sem mæta einn dag í viku í apríl og maí til að afla sér fræðslu sem tengist vinnunni þeirra.

Þátttakendur eiga sameiginlegt að hafa mjög lítið eða ekkert starfstengt nám að baki en langar að læra meira og efla möguleika sína á vinnumarkaði. Námskeiðið er hannað eftir kennsluáætlun frá Fræðslumiðstöð atvinnulífsins (FA) sem gerir m.a. kröfu um ákveðin fjölda kennslustunda. Í náminu er lögð áhersla á námstækni, sjálfstraust og lífsleikni ásamt vinnutengdum fögum líkt og kveðið er á um í kennsluáætlun FA. Hægt er að fá námskeiðið metið að hluta til framhaldsskólanáms og gagnast því ótvírætt þeim sem vilja halda skólagöngu sinni áfram.  

Leiðbeinendur á námskeiðinu eru aðallega fagfólk frá Vopnafirði sem tengist heilbrigðisgeiranum ásamt Else Möller en hún er menntaður hjúkrunarfræðingur og starfar hjá Austurbrú. Þá kemur Þórhalla Ágústsdóttir, hjúkrunarfræðingur frá Norðfirði, og kennir nemendum um sálrænan stuðning í kjölfar áfalla.