Í gær, á starfsdegi Austurbrúar, hélt starfsfólk stofnunarinnar í vettvangsferð til Fáskrúðsfjarðar og Stöðvarfjarðar til að kynnast starfsemi tveggja ólíkra aðila sem eiga það þó sameiginlegt að vinna í fiskvinnsluhúsi. 

Fyrst var ferðinni heitið til Fáskrúðsfjarðar þar sem starfsfólk Austurbrúar fékk að kynnast hátæknilegum vinnsluaðferðum hjá Loðnuvinnslunni en fiskvinnslan hefur tekið hröðum breytingum á síðustu árum. Friðrik Mar Guðmundsson, framkvæmdastjóri Loðnuvinnslunnar, fór yfir starfsemina, stefnu fyrirtækisins og uppbyggingu. Austurbrú hefur unnið með Loðnuvinnslunni að símenntun og m.a. unnið fræðsluáætlun fyrir fyrirtækið. Áður en haldið var frá Fáskrúðsfirði heimsótti hópurinn safnið Frakkar á Íslandsmiðum undir leiðsögn Fjólu Þorsteinsdóttur. 

Á Stöðvarfirði tók Una Sigurðardóttir á móti starfsfólki Austurbrúar í Sköpunarmiðstöðinni á Stöðvarfirði en hún er starfrækt í gamla frystihúsi staðarins. Una kynnti fjölbreytta starfsemi miðstöðvarinnar og sögu hennar, þá listamenn sem dvelja nú við störf í miðstöðinni og síðast en ekki síst hið nýja hljóðver, Studio Silo.

Austurbrú þakkar Loðnuvinnslunni, safninu Frakkar á Íslandsmiðum og Sköpunarmiðstöðinni á Stöðvarfirði fyrir afskaplega góðar móttökur. 

Myndir: Esther Ösp Gunnarsdóttir