Samband íslenskra sveitarfélaga leitar að tveimur framsýnum og metnaðarfullum verkefnastjórum til að starfa í nýju stafrænu teymi sveitarfélaganna á vegum Sambands íslenskra sveitarfélaga. Athygli vekur að störfin eru auglýst með möguleika á sveigjanlegri staðsetningu. Formaður SSA fagnar þessu og bindur miklar vonir um að fleiri störf verði auglýst með þessum hætti í framtíðinni.
Um er að ræða störf til tveggja ára „í þágu starfrænnar umbreytingar sveitarfélaga“ eins og segir í auglýsingunni. Bæði störfin eru auglýst með möguleika á sveigjanlegri staðsetningu og sérstaklega er vakin athygli á því að þeir sem ráðnir verða geti haft starfsstöð utan höfuðborgarsvæðisins á einhverjum af þeim starfstöðvum sem Byggðastofnun hefur kynnt fyrir störf án staðsetningar.
Einar Már Sigurðarson, formaður Sambands sveitarfélaga á Austurlandi, segir þetta mikið framfaraspor og bindur vonir við að þetta sé bara byrjunin. „Eftir heimsfaraldurinn ættu allir að sjá að þetta er ekki bara möguleiki heldur líka til þæginda,“ segir Einar Már. „Það eru allir búnir að prófa að fjarvinna og þetta hefur gengið eins og í sögu að svo mörgu leyti.“
Hann segir að þetta geti breytt miklu fyrir möguleika fyrirtækja og heilu samfélaganna, ekki bara á landsbyggðinni. „Þetta hefur auðvitað alls kyns áhrif,“ segir hann. „Þetta getur minnkað húsnæðisþörf fyrirtækja og þetta getur minnkað akstur í stórum samfélögum og ekki er vanþörf á því á þessum tímum sem við lifum á. En það sem við þurfum að tryggja hér útá landi er að aðstaða sé til staðar til að taka á móti svona störfum og það er virkilega ánægjulegt að sjá skrifstofuklasa eins og Múlann í Neskaupstað rísa þar sem fólk úr ólíkum greinum vinnur saman á einum stað. Það skiptir auðvitað máli að þú hittir fólk en það er hægt að skapa slíkan vettvang hvar sem er á landinu,“ segir Einar og hvetur Austfirðinga til að sækja um þessi störf hjá Sambandinu. „Öðruvísi koma þau ekki austur,“ bætir hann við að lokum.
Smelltu hér til að sjá starfsauglýsinguna frá SÍS
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn