Fjölmenni á Mannamótum
Austfirsk ferðaþjónustufyrirtæki fjölmenntu í Kórinn í Kópavogi á ferðakaupstefnuna Mannamót þann 19. janúar síðastliðinn.
Markaðsstofur landshlutanna halda ferðakaupstefnuna árlega á höfuðborgarsvæðinu, þar sem landsbyggðarfyrirtæki í ferðaþjónustu kynna sína þjónustu og vöruframboð fyrir innlendum jafnt sem erlendum kaupendum, s.s. ferðaskrifstofum og ferðaheildsölum. Öllum ferðaþjónustufyrirtækjum á landsbyggðunnum býðst að taka þátt í Mannamótum svo fremi sem þau eru samstarfsaðilar markaðsstofu síns landshluta.
Sýningin í ár er sú stærsta frá upphafi þar sem um 220 fyrirtæki frá öllum landshlutum utan höfuðborgarsvæðisins tóku þátt og tæplega 800 gestir lögðu leið sína í Kórinn. 21 sýnandi frá Austurlandi tók þátt, þar af 19 fyrirtæki og tvö sveitarfélög.
Vöruframboð fyrirtækja frá Austurlandi á viðburðinum var fjölbreytt og má þar m.a. nefna gistingu, safnaupplifun, mat og drykk og ýmis konar afþreyingu. Viðburðurinn hefur fest sig í sessi hjá austfirskum ferðaþjónum sem mæta ár hvert og að þessu sinni bættust tvö ný fyrirtæki við flotann og þreyttu frumraun sína á ferðasýningu.
Fannar Magnússon, hjá Hreindýragarðinum á Vínlandi:
Mannamót er frábær vettvangur til þess að stækka tengslanetið og kynnast öðrum aðilum í ferðaþjónustu á öllu landinu. Við vorum þarna í fyrsta skipti núna 2023 og vissum ekki alveg við hverju mátti búast. Móttökurnar sem að við fengum voru frábærar! Mikið af sóknartækifærum og gott að fá tilfinningu fyrir markaðnum. Við hjá Hreindýragarðinum munum klárlega mæta þarna aftur að ári til þess að kynnast nýju fólki og þjónustu. Ég mæli með því að allir sem eru í ferðaþjónustu taki þátt.
Auður Vala Gunnarsdóttir, eigandi Blábjarga Resort á Borgarfirði eystri:
Þetta eru ábyggilega bestu Mannamótin okkar hingað til og það er greinilega að skila sér fyrir okkur að mæta árlega. Ég varð vör við að margir væru að leita básinn okkar uppi, sem var mjög ánægjulegt, og það sem við erum að gera er að fá góðar viðtökur. Við hlökkum til að mæta aftur að ári!
Clea Braun, viðskiptastjóri þýska flugfélagsins Condor, sem mun hefja millilandaflug frá Frankfurt til Egilsstaða og Akureyrar á vormánuðum, kom að því tilefni til landsins og hitti austfirska og norðlenska ferðaþjónustuaðila. Hér til hægri má sjá hana í samræðum um Jónu Árnýju Þórðardóttur, framkvæmdastjóra Austurbrúar og Boga Nils Bogason, forstjóra Icelandair.
Austfirsk fyrirtæki efndu til gjafaleiks á Mannamótum sem gestum bauðst að taka þátt í. Vinningurinn var afar veglegur en vinningshafi hlaut ferð um Austurland að andvirði 660.000 kr. sem innihélt m.a. flug, bílaleigubíl, gistingu, mat og drykk og ýmis konar afþreyingu.
Áfangastaðastofa Austurlands hefur um árabil séð til þess að heildrænt útlit sé meðal austfirskra sýnenda á Mannamótum og hefur það ávallt vakið athygli gesta.
Mannamót eru haldin árlega og hafa fest sig í sessi sem einn stærsti viðburður ferðaþjónustunnar á Íslandi. Starfsfólk Áfangastaðastofu Austurlands vill þakka samstarfsaðilum sínum kærlega fyrir samveruna og samvinnuna á Mannamótum. Við hlökkum til áframhaldandi samstarfsverkefna.
Verkefnisstjórn
Alda Marín Kristinsdóttir
Sigfinnur Björnsson
Ingvi Örn Þorsteinsson
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
