Laugardaginn 9. maí voru 14 nemendur útskrifaðir úr Skrifstofuskólanum, námsleið frá Fræðslumiðstöð atvinnulífsins sem spannar tvær annir og lýkur með kynningu lokaverkefna. Unnið var í blöndu fjar- og staðnáms sem gefist hefur vel en þá er eitt fag tekið fyrir í einu. Við kynningu lokaverkefna kom glöggt í ljós hve sterkur og framsækinn hópurinn var en þar gaf að líta fjölbreyttar hugmyndir um stofnunun fyrirtækja eða nýsköpunarverkefni; allt frá pylsuvögnum til matvælaframleiðslu, handverks og bókhaldsþjónustu.

Umsjón námsins var í höndum Tinnu Halldórsdóttur sem leiðbeindi við gerð lokaverkefa og kenndi áfanga haustannar; upplýsingartækni og verslunarreikning en Þorvarður Sigurbjörnsson kenndi bókhaldsáfanga vorannar. Tilgangur námsins er að efla þekkingu og auka hæfni þeirra sem sinna eða hafa hug á að sinna almennum skrifstofustörfum með áherslu á tölvur, bókhald og skrifstofutækni. Námið spannar 360 klukkustundir sem mögulegt er að meta til 18 eininga á framhaldsskólastigi.