Vænlegir áfangastaðir fyrir beint millilandaflug
„Við viljum skapa hagfelld skilyrði fyrir eflingu ferðaþjónustu um allt land‘‘ – Lilja Alfreðsdóttir, ráðherra ferðamála.
Flugvellirnir Egilsstöðum og Akureyri efldir
Lilja Dögg Alfreðsdóttir ferðamálaráðherra hefur ákveðið að veita fjármunum í að efla kynningu á flugvöllunum á Akureyri og Egilsstöðum sem alþjóðaflugvöllum. Undirritaði hún samninga við Markaðsstofu Norðurlands og Austurbrú í flugturninum á Egilsstöðum af því tilefni en verkefninu er einnig ætlað að efla markaðssetningu á Norður- og Austurlandi sem vænlegum áfangastöðum fyrir beint millilandaflug.
Meiri dreifing ferðamanna
„Við viljum stuðla að aukinni dreifingu ferðamanna um land allt og eru bein millilandaflug skilvirk tæki til þess. Norður- og Austurland hafa mikið upp á að bjóða fyrir ferðalanga. Gæði gisti- og veitingastaða eru mikil, innviðir hafa eflst verulega og afþreying aukist til muna. Við viljum skapa hagfelld skilyrði fyrir eflingu ferðaþjónustu um allt land og á sama tíma stuðla að fleiri möguleikum í samgöngum til útlanda fyrir íbúa svæðanna. Í því felast ákveðin lífsgæði,‘‘ segir Lilja Dögg Alfreðsdóttir ferðamálaráðherra í fréttatilkynningu frá ráðuneytinu.
Aukin markaðssetning á flugvöllunum
Með samningunum styrkir menningar- og viðskiptaráðuneytið Markaðsstofu Norðurlands og Austurbrú um 20 m.kr hvora eða samtals 40 m.kr. Verður fjármununum meðal annars varið framleiðslu á efni fyrir áfangastaðina, þátttöku í ferðasýningum og viðburðum, samskipti við ferðastofur og ferðaheildsala og ýmsa eftirfylgni tengda markaðssetningunni á flugvöllunum.
Mikill áhugi
Mikill áhugi er á þessum flugvöllum og aukin meðvitund um möguleika þeirra til eflingar ferðaþjónustu um allt Ísland. Ný grein í flugtímaritinu Kay.Aero fjallar um flugvellina fyrir austan og norðan.
Lesa grein
Samstarfið kemur okkur lengra
Samstarf er á milli Isavia, Íslandsstofu, Markaðsstofu Norðurlands og Austurbrúar um áherslur í uppbyggingu millilandaflugs til Egilsstaða og Akureyrar. Nýlega var vinnufundur á Austurlandi þar sem fulltrúar þessara aðila fóru vel yfir tækifærin og verkefnin fram undan í samstarfi við ráðgjafa í þessum málum, Hlyn Sigurðsson frá Markvirk. Framundan er m.a. móttaka nokkurra blaðamanna sem sérhæfa sig í flugmálum auk áframhaldandi vinnu við að koma á millilandaflugi til Egilsstaða og Akureyrar. Að samstarfinu koma fyrir hönd Isavia, Sigrún Björk Jakobsdóttir framkvæmdastjóri Isavia innanlands ehf. og fyrir hönd Íslandsstofu Þorleifur Þór Jónsson, verkefnastjóri fjarmarkaða.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
