„Það er mín trú, sem og allra sem að þessu verkefni koma, að þetta eigi eftir að verða mikið framfaraskref, ekki bara fyrir ferðaþjónustu á Íslandi heldur líka fyrir íbúa á svæðinu sem nú munu eiga kost á að komast frá sínu heimasvæði með beinu millilandaflugi til Evrópu sumarið 2016. Það er sannkölluð lífskjaraaukning.“ – Úr ávarpi framkvæmdastjóra Austurbrúar, flutt í flugstöð Egilsstaðaflugvallar 7. október 2015. 

Ávarpið í heild sinni:

Það er mér mikil ánægja fyrir hönd Austurbrúar og allra okkar samstarfsaðila að bjóða ykkur velkomin á þennan kynningarfund um fyrirkomulag á beinu flugi á milli London Gatwick og Egilsstaða næsta sumar.

Grunnurinn að þeirri vinnu sem nú ber árangur var lagður í Sóknaráætlun Austurlands árið 2013. Þar var mörkuð sú stefna að efling alþjóðlegs flugs um Egilsstaðaflugvöll væri sóknarfæri í framþróun svæðisins. Verkefnið var vistað í Austurbrú sem þá var nýlega stofnuð og undanfarin tvö ár hefur linnulaust verið unnið að verkefninu innan Austurbrúar og ýmsar leiðir skoðaðar að settu markmiði. Greining okkar leiddi í ljós að verkefni af þessari stærðargráðu myndi ekki ná árangri nema með miklu og traustu samstarfi við umhverfið sem það sprettur úr. Við höfum fundið fyrir brennandi áhuga og stuðningi fjölda fólks sem hefur blásið okkur byr í brjóst þegar verkefnið hefur virst yfirþyrmandi. Vil ég því nota tækifærið hér og nú til að þakka þeim fjölmörgu aðilum sem hafa aðstoðað og eiga eftir að halda áfram að aðstoða okkur í þessari vegferð framþróunar á landsbyggðinni.

Áfangastaðurinn Ísland er í dag orðinn nokkuð þekktur áfangastaður í huga margra ferðamanna en eins og yfirskrift ársfundar Samtaka aðila í ferðaþjónustu bar með sér í vor, þá liggja „tækifærin á landsbyggðinni“ og þangað þarf kastljósið að beinast. Við gerðum okkur fljótlega grein fyrir því að samhliða vinnu við að koma á millilandaflugleiðinni sjálfri yrði að byggja upp áfangastaðinn. Verkefnið Áfangastaðurinn Austurland, samstarfsverkefni Ferðamálasamtaka Austurlands og Austurbrúar, var því rökrétt framhald en þar er svæðið að vinna sína stefnumörkun.

Viðfangsefnið í nýafstaðinni vinnustofu sem haldin var hér á Egilsstöðum um nýliðna helgi fjallaði m.a. um það á hvaða grunni við byggjum upp gott samfélag fyrir bæði heimamenn og gesti.

Á mánudaginn var kynnt ný stefna í ferðaþjónustu til lengri tíma með áherslu á sjálfbæra þróun. Kynntir voru sjö áhersluþættir sem unnið skal að á næstu fimm árum. Einn af áhersluþáttunum sem settir voru fram snýr að dreifingu ferðamanna með það að markamiði að allir landshlutar njóti góðs af fjölgun þeirra. Þar er opnun nýrra fluggátta til landsbyggðarinnar lykilþáttur. Annar áhersluþáttur snýr að jákvæðri upplifun ferðamanna og að ánægjan þurfi að vera bæði hjá gestum og heimamönnum.

Það er því mjög ánægjulegt að sjá að það sem við höfum verið að gera – og erum að kynna hér í dag – fellur fullkomnlega að nýrri, glóðvolgri stefnu fyrir ferðaþjónustuna á Íslandi.

Eitt að lokum:

Það er mín trú, sem og allra sem að þessu verkefni koma, að þetta eigi eftir að verða mikið framfaraskref, ekki bara fyrir ferðaþjónustu á Íslandi heldur líka fyrir íbúa á svæðinu sem nú munu eiga kost á að komast frá sínu heimasvæði með beinu millilandaflugi til Evrópu sumarið 2016. Það er sannkölluð lífskjaraaukning.

Ávarpið var flutt í flugstöð Egilstaðaflugvallar 7. október 2015 á kynningarfundi um beint flug milli Egilsstaða og London.