Sigurður Ingi Jóhannsson, samgönguráðherra, kynnti á fundi í Norræna húsinu í morgun drög að endurskoðaðri samgönguáætlun. Ýmsar breytingar hafa átt sér stað frá fyrstu drögum og nokkrar framkvæmdir á Austurlandi stendur til að ráðast í fyrr en áætlað var.

Fjarðarheiðargöngum verður flýtt fram til ársins 2022 en áður stóð til að hefja framkvæmdir við þau eftir árið 2030. Reiknað er með að hönnun ganganna taki tvö ár og framkvæmdir við þau sjö. Kostnaður við göngin er áætlaður 35 milljarðar króna og verða þau fjármögnuð með framlagi úr ríkissjóði og veggjöldum.

Jóna Árný Þórðardóttir, framkvæmdastjóri Austurbrúar, sagði á fundinum að tækifæri væritil að byggja upp sterkt miðsvæði Austurlands. „Hjá okkur fyrir austan eru að byggjast upp nýir atvinnuvegir. Ferðaþjónustan er að hjarna við, það eru mikil áform um fiskeldi og blússandi þróun í sjávarútvegi. Að hafa skýra sýn um hvernig samgöngumál munu þróast getur atvinnulífinu mikil tækifæri til að horfa til þess hvernig nýta megi þróunina til að efla samfélögin. Við vinnum alltaf með það í þessum minni samfélögum að þau byggja á sterku atvinnulífi og það byggir á samgöngum.Við horfum til þess að samkeppnishæfnin eykst. Það verður auðveldara að búa í einu hverfi, vinna í öðru og jafnvel vera með barnið í skóla í því þriðja. Þessar tengingar skipta okkar samfélag miklu máli og ég er sannfærð um að þær muni skila sér margfalt til baka.“
Sjá frétt Austurfréttar. 

Á þriðja og síðasta tímabili samgönguáætlunar, þ.e. á árunum 2030-2034, er nú gert ráð fyrir að hefja vinnu við göng frá Seyðisfirði til Mjóafjarðar og áfram yfir til Norðfjarðar. Þau munu kosta 31 milljarð króna. Samkvæmt endurskoðaðri áætlun á einnig að ljúka framkvæmdum við veginn yfir Hornafjarðarfljót og byggja upp heilsársveg yfir Öxi á fyrsta tímabili, þ.e. árunum 2020-2024. Í þriðja og síðasta tímabili áætlunarinnar er einnig gert ráð fyrir nýjum veg um Lón og endurbótum á veginum á milli Reyðarfjarðar og Breiðdalsvíkur. 

Til að fjármagna helming kostnaðar við ný jarðgöng og standa undir rekstri þeirra eldri verður farið að fordæmi Fæeyinga og gjaldtöku komið á í öllum göngum. Einnig er gert ráð fyrir veggjaldi á vegum yfir Öxi og Hornafjarðarfljót. 

Alþingi á eftir að fjalla um endurskoðaða samgönguáætlun og framkvæmdirnar eru einnig háðar fjárlögum árlega. Frekar upplýsingar um samgönguáætlanir má finna í samráðsgátt stjórnvalda en þar má einnig senda inn umsagnir.