Stjórnarmenn SSA hittust á fundi á mánudaginn í Fjarðabyggð. Þótt flestir fundir stjórnar séu haldnir á Teams er lögð áhersla á að halda að minnsta kosti einn staðfund í hverju sveitarfélagi landshlutans árlega. Á fundunum hittir stjórnin fulltrúa frá sveitarfélaginu sem heimsótt er og farið er yfir helstu verkefni.
Stjórnin átti góðan fund í Fjarðabyggð og rædd voru ýmis mál sem brenna á sveitarfélaginu eins og t.d. samgöngur, húsnæðismál og fleira. Þá tengdust stjórnarmenn fjarfundi með fulltrúum Íslands í norræna ungmennaráðinu ásamt fulltrúum annarra landshlutasamtaka og stýrihóps Stjórnarráðsins um byggðamál. Yfirskrift fundarins var „Ungt fólk og aðlaðandi framtíð“ og voru til umræðu hugmyndir ungs fólks um búsetugæði á landsbyggðinni.
Á fundinum ræddi stjórnin líka lokun sláturhúss á Vopnafirði og ályktaði um hana. Bókunina má lesa í fundargerðinni.
Mynd: Stjórn og framkvæmdastjóri SSA ásamt fulltrúum Fjarðabyggðar. F.v. Stefán Þór Eysteinsson, Þuríður Lillý Sigurðardóttir, Jóhann F. Þórhallsson, Axel Örn Sveinbjörnsson, Berglind Harpa Svavarsdóttir, Dagmar Ýr Stefánsdóttir, Helgi Hlynur Ásgrímsson, Ragnar Sigurðsson og Þórður Vilberg Guðmundsson.
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn