Í dag, þriðjudaginn 19. maí, verður í fyrsta skipti úthlutað úr Uppbyggingarsjóði Austurlands í Tónlistarmiðstöð Austurlands á Eskifirði. Veittar verða 58 milljónir til 85 verkefna til þess að efla atvinnuþróun og menningu í landshlutanum.

Alls bárust 147 umsóknir og var heildarupphæð verkefnanna um 796 milljónir króna og sótt var um tæpar 226 milljónir og fengu 85 verkefni styrk. Heildarupphæð styrkja nam 58 milljónum króna.

Úthlutunarnefnd Uppbygginarsjóðs leitaðist við að styrkja frekar færri verkefni en veita hærri upphæðum til þeirra. Þannig vonast hún til að styrkþegar eigi betri möguleika til að framkvæma það sem fyrirhugað er og að verkefnin geti jafnframt þróast til frekari vaxtar á næstu árum. 

Hæstu styrkina hlaut Sigurðardóttir ehf. – alls 3,6 milljónir – fyrir verkefni sem tengjast verðlaunaverkefninu Austurland – Designs From Nowhere. Óbyggðasetur Austurlands, LungA og Sköpunarmiðstöðin Stöðvarfirði fengu 3 milljónir hvert en aðrir fengu minna. Heildarlisti yfir styrkþega Uppbyggingarsjóðs Austurlands fylgir með sem viðhengi.

Nýr sjóður

Í upphafi árs undirrituðu Atvinnu- og nýsköpunarráðuneyti, mennta- og menningarmálaráðuneyti og Samband sveitarfélaga á Austurlandi samning um sóknaráætlun Austurlands og er uppbyggingarsjóður Austurlands hluti hans. Hann hefur það hlutverk að styrkja menningar- og nýsköpunarverkefni, auk annarra verkefna sem falla að sóknaráætlun landshlutans og tekur við af menningar- og vaxtarsamningum Austurlands. Þetta er samkeppnissjóður og því hljóta þau verkefni styrk sem uppfylla flest skilyrði skv. úthlutunarreglum, auk þess sem vandaðar umsóknir og viðskiptaáætlanir fyrir stærri verkefni töldust afar mikilvægar við mat á umsóknum. 

Úthlutun 2015.

Nánari upplýsingar veitir Signý Ormarsdóttir ([email protected]), verkefnastjóri Uppbyggingarsjóðs Austurlands, í síma 470 3811 og 860 2983.