Þrátt fyrir fækkun ferðamanna á landsvísu var árið 2019 gott fyrir ferðaþjónustuaðila á Austurlandi. Nýting hótelherbergja var sú langbesta sem mælst hefur í landshlutanum, þ.e. 47,3% samanborið við næstbestu mælda nýtingu árið 2017 sem var 40%. Á sama tíma dróst nýting hótelherbergja á höfuðborgarsvæðinu saman.

Helgi Sigurðsson rekur Blábjörg Guesthouse á Borgarfirði eystri ásamt konu sinni, Auði Völu Gunnarsdóttur. Hann segir að nóg hafi verið að gera á gistihúsinu á nýliðnu ári:

„Sumarið var svipað og árið 2018. Þá var nánast fullt hjá okkur og það sama má segja um sumarið sem var að líða. Þar sem allt var uppbókað gátum við í raun ekki bætt neinu við okkur yfir þá mánuði. Við sáum aukningu í fjölda gistinátta í vor og aftur núna í haust. Í september vorum við með um 75% nýtingu og í október var nýtingin 50%. Við getum ekki annað en verið ánægð með það.“

Gunnlaugur Jónasson hefur frá árinu 1997 rekið Gistihúsið á Egilsstöðum ásamt konu sinni, Huldu Elisabeth Daníelsdóttur. Hann segir reksturinn hafa gengið vel:

„Það rættist vel úr þessu ári, þrátt fyrir alla umræðuna. Hjá okkur var herbergjanýting betri nánast alla mánuði árins en hún var í fyrra. Yfir árið er þetta 15% aukning að jafnaði. Það hljómar kannski svolítið furðulega en loðnubresturinn hafði eiginlega meiri áhrif á okkur en fall WOW air. Til okkar kom oft starfsfólk í sjávarútveginum, bæði til að fara í heilsulindina og að borða mat.“

Frekari upplýsingar: Landsbanki Íslands